GREENSBORO/LOS ANGELES, Merca – Otro dos muhe a acusa Donald Trump diabierna, di a mishi cu nan, incluyendo un ex participante di e reality show “The Apprentice,” mientras cu e candidato Republicano pa e presidencia di Merca, a bisa cu e comentarionan ta parti di un complot pa decredite faltando algun siman pa e eleccion.
Summer Zervos, kende a participa den e di cinco temporada di e programa televisivo di Trump na 2006, a duna un rueda di prensa na Los angeles, caminda cu e multimiyonario a purba pa drumi hunto cune riba un cama ora cu nan a reuni na 2007 pa discuti un posibel empleo.
“Despues cu el a pidimi pa mi sinta hunto cune, mi a acepta. E ora el a garami di un schouder y a cuminsa sunchi mi agresivamente y a pone un man na un pecho,” Zervos a sostene.
Mientras tanto, e corant Washington Post a publica un entrevista cu un muhe kende a bisa cu Trump a hinca su man bao di su saya, sin su consentimento, den un club nocturno na New York, na principio di e decada di 1990.
“El a mishi cu mi parti priva atrabes di mi paña di abao, claramente,” Kristin Anderson a bisa den un video publica riba e website di e corant. “E no tabata un corteho sexual. Mi no sa pakico el a haci’e. E tabata manera cu simplemente e kier a mustra cu e por haci’e,” Anderson a agrega, kende no tabata inmediatamente disponibel pa duna comentario.
Den un acto di diabierna atardi, Trump a denuncia cu firmesa cu e acusacionnan den su contra ta historianan inventa. “Mi no sa kende nan ta (…) Mi ta kere cu nan ta lastrando mi na algo desagradabel. Nan no tin testigo, no tabata tin ningun hende cerca,” el a sostene den un discurso na Greensboro.
“Probablemente algun ta haci’e pa tin un poco di fama gratis. E ta totalmente arma. Awo, di pronto, despues di hopi aña, acusadornan falso ta aparece den menos di un luna di un di e eleccionnan mas importante di historia di e pais,” el a agrega.
E campaña do Trump pa yega na Cas Blanco tabata purbando di recupera di e publicacion di un siman atras, di un video di 2005, caminda cu e candidato ta blof di a mishi muhenan y di a presionanan sexualmente.
Si ta bon, Trump ta bisa cu e video ta solamente un “locker room talk” y cu nunca el a comporta di e manera ey, hopi muhe a haci publico su acusacionnan despues cu esaki a sali na cla.
E candidato Republicano pa e Vice presidencia, Mike Pence, a defende cu Trump cu firmesa. “Sigui atento. Mi sa cu lo bay tin mas informacion cu lo keda publico cu lo apoya su afirmacion cu tur cos ta categoricamente falso,” Pence a bisa den e programa di television di CBS “This Morning.”
Fuente: Reuters