Sra. Rulienne Arends di Fundacion Anti Droga Aruba ta splica mas tocante nan campaña nobo ‘Awe No, cual ta un reto di 40 dia. Esaki ta un campaña unda e persona lo bay laga su mal habitonan un banda.
E reto ta encera si un persona ta bebe alcohol, of huma, pa 40 dia e persona lo challenge su mes pa laga su mal habitonan un banda y pa wak con e ta sinti mentalmente y fisicamente pa laga e habitonan aki. E reto ta encera tambe, manera p.e. laga junk food, refresco. Pa 40 dia reta bo mes, hunto cu coleganan, amigonan y famia pa tuma e retonan di 40 dia.
Como Fundacion Anti Droga Aruba, cu e campaña ‘Awe No’, nan ta focus riba personanan cu tin problema cu adiccion, kico e persona ta sinti pa laga su mal habitonan un banda. E ta un campaña pa tur persona.
Sra. Arends a splica cu Carnaval a wak hopi caso, apesar cu FADA tabata tin su campaña DIDI, tabata tin charlanan na scol, toch e abuso di alcohol tabata presente. Awo ta un oportunidad pa probecha e 40 dianan un banda, para keto un rato y pensa di berdad, si alcohol ta necesario. Ta test 40 dia sin cumpra nada di alcohol, kico e ta haci cu un persona mentalmente. Y importante, kico e lo nifica den e parti financiero.
Riba FADA su facebook page, lo ta bay tin mas informacion, como tambe riba Instagram, Snapchat, y tambe lo bay tin motivational quotes, pa asina motiva tur hende pa sigui e reto di 40 dia. FADA su personal mes lo tin nan propio reto, caminda nan lo reta nan mes pa no bebe nada di soft. Tambe studiantenan di IPA, di seccion Movecion y Salud, lo tin algun tips pa ora laga softdrink, cu kico lo por reemplase cun’e.
Por ultimo, Sra. Rulienne Arends, di FADA a splica cu nan tin studiantenan di Universidad di Aruba, cu e aña aki ta cargando e campaña ‘Awe No’ di FADA, cu lo tene un workshop awe nochi, unda cu lo duna mas informacion tocante e campaña aki.