Cindy Lacle, trahado preventivo na Fundacion Anti Droga Aruba ta informa cu e siman aki FADA, despues di un reaccion positivo di e comunidad di Aruba, lo lansa e di dos temporada di documentario basa riba bida real. Den e documentario aki pueblo di Aruba lo presencia storianan di diferente persona, entre otro cu a rehabilita di adiccion, otronan cu ainda ta den e lucha aki, Arubiano cu a wordo encarcela den exterior, y famianan cu te dia di awe ta sufri cu dolor pasobra un di nan ser keri ta den adiccion.
E meta di e documentario aki ta pa Aruba conoce e factornan cu ta contribui na un persona pa yega haci uzo di substancianan adictivo, entre otro factornan manera problema social, problema familiar, abuso sexual, fisico y emocional, trauma, mal amistad y otro factornan cu ta contribui na personan bay over na haci uzo di cierto substancianan cu por yega te na adiccion. Cada storia ta diferente y tur persona a duna su autorisacion pa conta su storia y esaki wordo publica. “E storianan aki tin un efecto hopi grandi riba loke ta salud mental, no solamente di e persona pero tambe di su ser kerinan y amistadnan,” segun sra. Lacle.
Cumisando e siman aki Diahuebs, 3 December, FADA lo pasa e prome episodio di temporada dos di e serie di documentario na diferente canal local di television y plataforma social.