Rish-anne Ammerlaan, trahado preventivo na FADA ta splica MasNoticia cu pa ocho aña caba den luna di October ta organisa e Siman di Bisti na locura. Un siman caminda ta conscientisa pueblo riba abuso y traficacion di droga, alcohol, tabaco y tambe violencia.
E campaña aki a cuminsa cu iniciativa di FADA uniendo nan mes cu Red Ribbon Week, unda na Merca un agente a wordo mata den un manera violento por medio di investiga e cartelnan e temponan ey. FADA a uni su mes na e campaña aki anto e aña aki siman di locura ta dia 26 pa 30 di october.
Manera conoci, cada dia ta un dia cu bo ta bisti na un diferente tema. Locual ta diferente e aña aki ta cu un dia a wordo dedica na Frontliners mirando e situacion diferente cu nos ta haya nos mes e aña aki, na unda cu ta nos frontliners ta bringando pa mantene nos comunidad protehi.
Tur aña e ta un campaña di social media na unda bo ta saca potret di e dianan cu bo ta participa, comparti riba FADA su Facebook. E aña aki e ta keda un campaña di social media pero e manera di participa lo ta un tiki diferente cual lo wordo anuncia pronto na con bo por participa. E aña aki FADA a lansa su website nobo y ta algo cu sigur nan kier haci uzo di dje.
Team di FADA a evalua si lo bay door e aña aki cu Siman Di Bisti Na Locura y hunto nan a dicidi cu nan ta bay door cu ne pasobra e ta un manera positivo y constructivo na unda hunto un comunidad ta para keto y conscientisa riba abuso y prevencion di droga, alcohol, tabaco y violencia en general.
FADA: “Y nos ta pensa cu tog pa un rato esaki ta keta e mente for di e situacion dificil cu nos ta pasando aden actualmente.” FADA lo organisa un rueda di prensa pa splica den detayes mas riba loke ta trata e Siman di Bisti na Locura
