Fundacion Anti Droga Aruba ( F.A.D.A ) ta haci un invitacion na pueblo henter pa ban uni forsa den luna di October y bisti nos cinta cora pa demostra cu bo ta contra e uzo y abuso di droga. Den un forma pasivo nos ta mustra nos inkietud, nos preocupacion y bisa cero tolerancia na e baho mundo di droga.
Entre e siman 23 di October pa 31 di October nos ta celebra Siman Di Cinta Cora. E lema e aña aki ta YOLO, (You Only Live Once) Be Drug Free.
E Siman Di Cinta Cora ta un campaña di prevencion y conscientisacion relaciona cu alcohol, tabaco, otro droganan y violencia. E campaña aki ta ser efectua cada aña den luna di october. Den e siman di cinta cora F.A.D.A. ta organisando pa di 4 aña caba e famoso “Siman Di Bisti Na Locura” pa nos comunidad.
Siman di Bisti na Locura tin como meta na un manera simpel y original demostra cu Bo tambe ta contra di e uzo y abuso di droga, alcohol y di traficacion di droga.
Dia y tema:
Dialuna 24 October: Bisa NO na droga (bisti un paña of articulo cora)
Diamars 25 October: SOX it na droga (bisti meanan colorido of no usual)
Diaranson 26 October: Sigui bo soño (bisti na un super hero, profesion na bo gusto of pidjama)
Diahuebs 27 October: Team up contra droga (bisti algo di bo team faborito, p.e. di deporte)
Diabierna 28 October: “YOLO” DAY (algo creativo cu e mensahe di “YOLO, Be Drug Free”)
Con pa participa:
Forma bo grupo. Bisti manera e schedule, saca potret y post e riba e Facebook page FADA ARUBA. Share boso creatividad pa asina haya mas popularidad y haya chens pa gana premionan atractivo. Nos kier pone enfasis pa ta mas creativo cu ta posibel. “Think out of the box”!
E aña aki F.A.D.A. kier involucra mas hende pa participa den e campaña!
Pa haya mas chens pa gana, nos kier pa participantenan trece e mensahe di “YOLO, Be Drug Free” dilanti dor di decora nan cura of entrada di cas, scol of trabou etc. Esaki por wordo haci durante ful e luna di oktober! E decoracion mester encera e lema di YOLO y mester tin e Cinta Cora di Siman di Sinta Cora. Saca potret di boso creacion y post esaki tambe ariba e Facebook page FADA ARUBA. Share esaki pa tambe haya chens pa bira un di e feliz ganadonan.
Premionan lo wordo parti bou di tres diferente categoria: Popularidad, creatividad y premio pa trece e lema di “YOLO, Be Drug Free” mas educativo dilanti.
F.A.D.A. ta acerca tur scol, empresa, organisacion, traimerdia, pa aporta na e evento aki door di stimula e mucha, studiante, docente y trahadonan pa forma parti di e evento. Tuma contacto cu nos y anos mes lo pasa saca potret si ta necesario.
Den e luna aki nos lo cuminsa bende nos productonan pa recauda fondo manera mugs cu e lema, tambe e cintanan cora. Pa mas informacion por tuma contacto cu F.A.D.A. na number di telefon 583-2999.