FADA e aña aki un biaha mas ta bin cu nan carrousel

Ya pa varios aña caba, Fundacion Anti Droga Arubano (FADA) ta bin cu e famoso “Carrousel” cual ta conforma pa un team di profesionalnan trahando den diferente fundacion y cu ta uni pa asina trece informacion relevante y pa conscientisa e hobennan durante e temporada di carnaval. Nan ta acerca diferente scolnan secundario pa asina nan haya informacion di cada un instancia pa locual ta trata e temporada di carnaval. Sra. Rulienne Arends, Trahado Preventivo di FADA, ta amplia mas ariba esaki.

Cada un instancia lo papia ariba nan topico y esaki ta link e hopi na Carnaval. FADA a uni forsa tambe cu DVG, pa loke ta nan campaña “Mi escogencia tin consecuencia”. Cada un di e instancianan cu ta bay duna nan presentacion lo bay duna tur hende un conseho pa nan corda cu decisionnan cu nan ta bay tuma, vooral den temporada di carnaval, aki paar di luna por tin un consecuencia: sea positivo of negativo.

Pa loke ta trata FADA, e focus principal lo ta alcohol, cual ta e droga cu ta bin mas dilanti durante e temporada aki. No solamente bou di hoben, pero tambe bou di adultonan. Pa esaki a scoge un biaha mas pa haci e presentacion di alcohol. Sin lubida e parti di droga cu ta bin dilanti, pero e parti di droga otro fundacionnan lo elabora ariba e tema aki.

Mayoria di e fechanan ta geboek caba, for di november. Si tin algun fecha habri y scolnan cu lo kier haya un presentacion, por tuma contacto cu FADA.

Comments

comments