Diamars, durante un conferencia di prensa, Fundacion Anti Droga Aruba (FADA), a lansa un video basta emotibo, den cuadro di un campaña grandi cu nan tin tur aña, specialmente durante e dianan di fiesta, cual ta Amigo Didi.
Manera tur hende sa, FADA ta enfoca riba e temporada di fiesta, unda cu e video riba su mes lo crea un impacto sigur riba comunidad, mirando e ultimo videonan cu nan a lansa ultimamente. E aña aki esaki no ta keda afo, specialmente durante luna di december.
Riba e video por mira un grupo di amigo cu a sali pa pasa un rato hunto, consumiendo bebida alcoholico y despues di un cambio di frame por mira e un di e amigonan envolvi den un accidente, caminda un amistad di dje a bin ta fayece. Segun Amyna Kellt, trahado preventivo di FADA, esaki ta algo cu por of ta pasa normalmente, ora cu un hende ta stuur auto bao di influencia di alcohol y hopi biaha, e pasahero na banda (co-piloto den e caso aki) a bin ta fayece.
E video aki lo ta riba tur plataforma social. Lo pone riba Facebook, Instagram y tambe lo wak e riba tur media y television.
Cu e video aki FADA kier mustra e importancia pa tin un persona responsabel designa cu ta core auto pa asina bo yega cas na un manera sigur. Tin cu corda cu semper tin un hende na cas cu ta warda bo. No pensa riba bo mes, sino corda riba otro tambe, segun Kelly. .
Na Aruba ta un custumber, vooral rond di e dianan di fiesta, ta consumi alcohol. Kisas ta consumi asina tanto alcohol cu despues no por para riba pia y no lo por stuur auto tampoco manera cu sa haci, segun director di FADA, Rhomyko Winklaar, kende alabes a conta cu e controlnan di autoridad ta necesario p’esaki, pero mester ta consciente cu alcohol tin hopi influencia riba con nos ta maneha nos mes. Esey ta pone cu nos por perde cierto habilidad pa ora di stuur un auto. Eynan ta caminda FADA a para keto tambe riba esaki, mirando cu e dianan di fiesta ta den porta.
FADA sigur tin un trabao hopi grandi. Nan ta den tur scol papiando den nan charla riba alcohol, mirando cu e temporada di fiesta ta yegando. Hopi biaha ora bay duna charla, por mira hopi mucha cu ya caba kico ta alcohol. Sin laga afo FADA sigur ta haci su trabao den e parti aki, cu ta drenta scol y ta purba di duna mas informacion cu ta posibel.
Conseho ta “Don’t Drink and Drive.” Bo bida ta bal hopi, bida di otro tambe ta bal hopi. Sea consciente ora di consumi alcohol y subi tra’i stuur.
