FADA a celebra 35 aña di existencia na Riu Palace Antillas

Fundacion Anti Droga Aruba (FADA) a celebra nan 35 aña di existencia na Riu Palace Antillas. Hunto cu miembronan y invitadonan special a pasa un rato agradabel disfrutando di snacks, co’i bebe y di e musica. FADA a probecha di e momento importante aki y lansa nan documentario pa tur esunnan presente.

Na 1984, 3 mayor tabata concerni cu e epoca y nan a bini hunto pa funda Fundacion Anti Droga Aruba despues di a mira e problemanan di e uzo y abuso di droga y alcohol cu tabatin. E problema aki a keda desaroya ora cu Aruba a crese den e areanan social, economico, turismo. Pero awendia mayornan ta traha hopi y esey ta haci cu mayoria biaha muchanan ta keda nan so, consecuentemente cu tin hopi peliger p’e hobennan mirando e cantidad di droga nobo.

Pa por sigui conscientisa hendenan riba e problema aki, FADA a bin cu e idea 1 aña pasa pa traha documentario basa riba e bida real di personanan rehabilita, cu ta den proceso di rehabilitacion y tambe adictonan ambulante. Haci esaki pa asina pueblo di Aruba por a haya sa mas riba e origen y factornan cu a conduci un persona na haci uzo di un substancia legal of ilegal. Un biaha mas a bin cu e documentario basa riba e bida real y e biaha aki e fundacion a enfoca mas riba e parti di alcohol. A bin cu testimonionan di personanan den un situacion di a tuma e decision di core auto bou influencia di un substancia. Haciendo esaki nan a ocasiona un desgracia.

Den nomber di Fundacion anti Droga Aruba nos kier a gradici Riu Palace Antillas inmensamente pa nan sosten, colaboracion y nan responsabilidad social cu e comunidad Arubiano. FADA ta haya cu sin e apoyo y donacion di Riu Palace Antillas nan no por a lansa e documentario den forma aki y ni celebra nan 35 aña di exsistencia. FADA ta invita tur hende pa sigui tur diamars nan documentario pa 9:10pm via Telearuba, Canal 22, Diario TV, 24ora, Masnoticia y tur medio social. Riu Palace Antillas ta orguyoso di aporta cu comunidad di Aruba y specialmente cu fundacionnan.

Comments

comments