E conferencia 360 Happiness di Organisacion Mundial di Turismo di Nacionnan Uni teni na Aruba a yega su fin. E tabata un conferencia a conta cu participacion local y internacional. Un conferencia asina importante no por a keda sin participacion di e Decano di e Facultad di Hospitalidad y Turismo di Universidad di Aruba, John J. Wardlaw. E ta un experiencia unico y no ta tur ora Aruba ta anfitrion di un conferencia di e indole aki pa cual e Decano a haci un apelacion na ATA, organisador di e Conferencia, pa permiti tur e studiantenan di e facultad participa den e conferencia aki. E ta un oportunidad unico pa e studiantenan cu di e forma aki ta haya e experencia cu sigur lo no por logra cu e lesnan tradicional, scuchando oradornan internacional. Unabes cu a haya aprobacion, e Decano di e Facultad di Hospitalidad y Turismo a dicidi di cancela e lesnan durante dos dia pa e studiantenan haya chens di participa. “Sacando e studiantenan for di e aulanan y laga nan scucha discurso di e profesionalnan cu ta den e ramo papia di “Felicidad” y tambe por a scucha di investigacion cu oradornan a haci. Investigacion den e ramo aki, e Decano a splica, ta algo masha importante den e Facultad di Hospitalidad y Turismo. Interesante pa e studiantenan tabata e discurso di Michel Page, riba turismo den Caribe cual ta temanan cu sa discuti den lesnan. Den e conferencia tabata interesante pa nan scucha for di esnan cu ta den e mundo di turismo. E Decano ta hopi agradicido cu di e forma aki ATA a reconoce e rol importante e Universidad tin y e importancia pa e studiantenan scucha e oradornan. Principalmente pasobra e generacion di e studiantenan aki ta e futuro lidernan den e ramo aki.Henter e Facultad di 75 studiante y 14 exchange student –di Belgica, Alemana, Republica Checo, Hulanda y Merca – a haya e oportunidad unico pa atende e Conferencia Internacional di Nacionnan Uni. Tur e studiantenan mester traha un rapport di nan partcipacion cu mester ta manera un evaluacion di loke nan a experencia, entre otro kico ta bon, kico tabata malo y con miho e por tabata.Un di e hobennan cu a participa den e conferencia di Nacionnan Uni tabata Danyela Vasquez, junior class representative, kende ta forma parti di e di dos aña di e estudio di Bachaelor Program. No solamente e tabata eynan como participante pero pa yuda tambe cu e organisacion, mirando cu “event” ta un parti di e lesnan cu nan ta haya den Hospitalidad y Turismo. E cooperacion den e organisacion ta un experiencia pa e ramo cu e ta studiando. E kier contribui na un miho maneho di turismo, haci’e mas sostenibel y con hunto por logra un miho turismo pa Aruba.E hoben ta kere cu localnan mester realisa cu turismo ta hop importante pa Aruba, pa no perde esaki for di bista. “Nos mester ta agradecido e turistanan cu ta keda bolbe y trata esnan nobo cu hopi cariño pa nan sigui bishita e isla. Nan por scoge cualkier destinacion na Aruba, pero mester demostra cu Aruba ta nan cas pa sigui bshita e isla. Esaki nos mester enfoca riba dje,” e hoben a bisa.