Tecnologia
CALIFORNIA- Facebook a reconoce diahuebs cu e paswoordnan di mas un biyon usuario a wordo gesaved den servernan interno, sin wordo encripta. E gigante tecnologico a bisa di biaha cu no tabata tin fayonan di siguridad.
“Nos a resolve e problema y, como medida di precaucion, nos a avisa tur esunnan kende nan paswoord a wordo gesaved di e forma aki”, Facebook a bisa den un comunicado, unda cu el a splica cu normalmente su sistema mester a encripta esakinan.
E gigante di rednna social tin e intencion di avisa di e echonan aki na “biyones di usuario di Facebook Lite”, un version menos pisa di e portal pa regionnan di mundo cu’n conexion di internet di menor calidad, “na biyones di otro usuarionan di Facebook y mas di 10 mil usuario di Instagram”, el a bisa den un comunicado.
“E paswoordnan aki nunca tabata visibel pa niun hende pafo di Facebook, y te cu awe, nos no a haya evidencia di cu un hende lo a abusa internamente of tabata tin acceso indebidamente na nan”, e red social, cual imagen ya caba ta basta susha door di su gestion di e datonan personal di su usuarionan, a reitera. Esaki ta specialmente desde di e scandal di Cambridge Analytica na 2018.
Segun e portal specialisa den cybersecurity KrebsOnSecurity, cerca di 20 mil empleado di Facebook tabata tin acceso, den algun caso durante varios aña, na biyones di paswoordnan warda den texto normal.
Algun luna atras, Facebook a reconoce cu hackernan lo por tin acceso na cuentanan di biyones di usuario causa door di un bug, un defecto informatico.