SAN FRANCISCO, California – E red social Facebook a declara accidentalmente morto na usuarionan bibo, reconociendo despues di a soluciona e problema diabierna, cu nan a comete un “eror teribel.”
“Pa un brece periodo di awe, un mensahe destina na perfilnan conmemorativo a wordo eroneamente publica riba otro cuentanan,” un vocero di Facebook a bisa AFP diabierna.
E gigante Mericano a se±ala cu “esaki tabata un eror teribel cu ya nos a drecha.”
E informe di e medionan a indica cu mas of menos dos miyon di memorial eroneo a wordo poni riba e paginanan di perfil. E red social a disculpa y a bisa cu nan lo traha mas rapido posibel pa coregi e problema, segun AFP.
“Homber. Mi mester a uza Facebook Live pa mustra con ami tabata un Facebook Dead,” e editor di Search Engine Land, Danny Sullivan a bisa den un mensahe di Twitter. E caracteristica di Facebook Live ta permiti personanan difundi video den realtime riba e red social aki.
Incluso e cofundador y director ehecutivo di Facebook, Mark Zuckerberg, a wordo recorda den un mensahe riba su pagina di perfil expresando e speransa cu hendenan cu a stim’e lo wordo reconforta den postnan comparti den homenahe na su bida.
E avisonan eroneo tabata contene links na e formularionan cu por a wordo remiti pa obtene cuenta di personanan riba e red social modifica den memorialnan online despues cu nan muri. Parti di e proceso ta pa mustra pruebanan di difuncion.
Fuente: El Universal