LONDRES, Reino Uni (AP)— Facebook a informa cu 115 cuenta a wordo blokia, riba sospecho di “conducta inautentico coordina”, relaciona cu gruponan di exterior cu tabata purba interferi den e eleccionnan di diamars na Merca.
E red social a cera 30 cuenta di Facebook y 85 di Instagram, y esakinan ta wordo investiga mas a fondo, segun un mensahe di e blog dialuna anochi.
Diadomingo anochi, e compania a ricibi un aviso di polis di cu nan a descubri actividadnan online cu “nan ta sospecha cu lo por ta relaciona cu entidadnan di exterior”, e hefe di cibersecurity di Facebook, Nathaniel Gleicher a skirbi.
E compania tecnologico Mericano ta ahustando e siguridad y ta combati campañanan di desinformacion pa esaki no afecta e votantenan y cu democracia wordo desacredita. Esaki ta como parti di e medida di Facebook pa preveni abusonan cometi door di e Rusonan dos aña pasa pa inclina e opinion publico relaciona cu eleccionnan presidencial na 2016.
Gleicher a bisa cu e compania lo publica un update unabes cu nan tin mas informacion, “incluso si e e cuentanan aki ta vincula cu e Agencia di Investigacion di Internet cu sede na Rusia of otro entidadnan stranhero”.
Casi tur e paginanan di Facebook asocia cu e cuentanan blokia tabata sea na Frances of Ruso. Mayoria di e cuentanan di Instragram blokia tabata na ingles y tabata focus ariba celebridadnan of e debate politico. Mas informacion no a wordo suministra tocante e cuentanan of actividadnan bou sospecho.
Luna pasa, Facebook a elimina 82 pagina, cuentanan y gruponan vincula cu Iran cu tabata busca pa fometa e agitacion social na Merca y Gran Britania. Na augustus el a elimina 652 pagina, grupo y cuentanan vincula cu Rusia y Iran. Twitter a bisa di a identifica mas di 4600 cuenta y 10 miyon tweet, den nan mayoria vincula cu e Agencia di Investigacion di Internet.
E Agencia di Investigacion di Internet ta esencialmente un fabrica Ruso di mensahenan abusivo of troll, na cual e investigado special Robert Mueller, a acusa di injerencia den e eleccionnan di 2016.