Recientemente empleadonan di e compania Fuels Marketing & Supply Aruba a topa cu otro, relaciona cu e hecho cu desde dia 1 di October 2016 Refineria di Aruba ta e doño nobo di e compania, cu na su turno tin como unico doño, Gobierno di Aruba. Esey ta haci cu simbolicamente, porfin gasolin, diesel y jetfuel awor ta den nos mesun man.
Benta di combustibel na Aruba ta data desde decadanan atras, for di tempo di Refineria Lago. Cu tempo a separa e trabounan di refina petroleo for di e compra y benta di gasolin, diesel y jetfuel na comunidad. Despues di Lago e compania a sigui bou di e nomber di Esso Petrolera te ora cu Coastal Refinery a tuma e refineria over. E tempo ey, na aña 1995 a yama e compania Coastal Aruba Fuels Company (CAFCO) y desde aña 2009, despues cu Valero a tuma e refineria over, a yama e compania Valero Marketing & Fuels Supply Aruba (VMSA). Desde dia 1 di October 2016 a bin cambio atrobe y awor e compania yama Fuels Marketing & Supply Aruba, FMSA y su unico doño ta Refineria di Aruba.
E compania ta conta cu un flota di 13 truck grandi cu ta transporta combustibel pa e stacionnan situa tur rond Aruba, mientras nan tin 6 truck mas chikito cu ta opera na Aeropuerto, unda nan ta bende jetfuel cu e avionnan. Na tur FMSA ta conta cu 37 empleado, bon prepara y capacita pa maneha mas o menos 200 miyon liter di combustibel pa aña. Desde 1 di October 2016 nan operacion ta bira mas grandi ainda, awor cu FMSA lo ta encarga pa bende “Fuel Oil” cu WEB, locual lo bira un responsabilidad mas grandi, mester percura pa mas abastecemento y entrega.
Den un encuentro bon atendi pa e empleadonan di FMSA, hunto cu e dirigentenan di Refineria di Aruba, a celebra e cambio aki y a brinda pa e futuro nobo cu tin dilanti e compania aki. Fuels Marketing & Supply Aruba ta orguyoso di por abastece henter e pueblo di Aruba cu combustibel.