For di aña pasa hopi hende no ta contento cu nos camindanan cu a keda den mal estado despues di awasero, y a presupuesta extra placa pa drecha algun camindanan. Pa cu esaki DOW a haci destaho publico na fin di aña. Minister di Obranan Publico, Sr. Benny Sevinger ta splica.
Varios ta e camindanan cu ta bay wordo drecha y un di e camindanan cu a keda den mal estado tabata esun di Sabana Basora, cu a caba di cuminsa. E drechamento ta bay den dos fase, e prome ta esun cu ta yega te na Spaans Lagoen, y e otro ta bay yega te Sta. Cruz. E caminda ta wordo haci parcialmente door di Thiel Corporation y tambe door di DOW mes.
Pa e trabaonan aki, a cumpra varios ton di asfalt, cu DOW riba un lista aproba door di Parlamento, lo bay drecha diferente camindanan rond di Aruba. Sinembargo, segun minister Sevinger, e placa nunca lo yega, pa cual mester pone prioridad. Aworaki ta wardando aprobacion, pa un parti di e placa cu a resta di FDA, cual lo wordo uza un parti di infrastructura. E parti di destaho publico ya ta cla, awo lo cuminsa cu e parti di ehecucion.
Tambe ta wardando aprobacion di e di dos parti di e aanbesteding, lo drecha varios camindanan den bario, di e placa cu a keda ainda di FDA. Ta wardando pa e placa wordo realoca. Ministerio di Obranan Publico ta trahando y DOW a haci un lista di e estado di e camindanan y a base di prioridad, lo drecha e camindanan.
Aruba tin hopi aña sin haya awasero pisa, y esey ta nifica cu e trabao ta grandi pero poco poco lo haci parti in- house., dus DOW mes lo haci esaki. Y e otro parti di trabaonan mas grandi, lo tene un destaho publico y e compania cu gana esaki lo mester cumpli cu e trabao aki pa drecha e camindanan. E situacion aki tin e atencion completo di e Minister y ta trahando riba dje for di December caba. Mirando cu e temporada di yobida a pasa, lo por bay over na drechamento di e camindanan.
Ta pidi poco pasenshi, tin camindanan di tera cu mester wordo drecha y tambe esunnan di asfalt cu mester haya nan capa nobo di asfalt. E trabaonan aki no ta trabaonan chikito, y no ta trabaonan cu ta caba den un paar di siman of paar di luna, pero ta trahando ariba esaki conhuntamente cu DOW, segun Minister di Obranan Publico y Infrastructura, Sr. Benny Sevinger.