Minister Hooyboer-Winklaar ta contento pa anuncia cu gobierno di Aruba a reanuda e acuerdo cu St. Mary’s College di Maryland pa 5 aña mas. Na comienso di 2016 e titular di enseñansa a formalisa un acuerdo cu e instituto aki cu ta inclui diferente incentivo special pa nos studiantenan di Aruba. Entre nan un scholarship special y tambe descuento riba gastonan di estudio pa tur studiante cu ta cumpli cu e average di puntuacion stipula den e acuerdo.
St. Mary’s College ta un instituto di enseñansa superior cu ta keda den e estado di Maryland y tur programa e College ta ofrece ta acredita como “honors”. Minister di Enseñansa Michelle Hooyboer-Winklaar, despues di follow up riba combersacionnan di un bishita na Maryland na comienso di 2016 a logra cera e acuerdo special y awo a logra extende pa un periodo mas largo di cooperacion.
Minister Hooyboer-Winklaar ta splica cu e acuerdo cu a extende cu St. Mary’s College ta inclui un “Aruba Residential Student Scholarship” cu ta encera un scholarship automatico di $ 3000,- pa aña pa studiantenan di Aruba. Studiantenan di Aruba ta cualifica pa ricibi e Residential Scholarship aki tur aña durante un periodo di 4 aña consecutivo. E scholarship aki ta yuda baha e gastonan anual di estudio pa nos studiantenan. Banda di e Residential Scholarship di $ 3000,- pa aña studiantenan di Aruba tambe por bin na remarke pa un Merit Scholarship di $ 15.000,- pa aña pa studiantenan di prome aña (first year) y transfer students por bin na remarke pa un Merit Scholarship te na un maximo di $ 8000,- dollar pa aña. Ambos scholarship ta wordo otorga den caso cu studiantenan di Aruba cumpli cu e rekisitonan stipula pa loke ta Grade Point Average (GPA) como tambe e resultado di SAT. E Merit Scholarship ta wordo extende cada aña te na un maximo di 4 aña den caso cu e studiante mantene su GPA na e nivel cu ta wordo stipula den e acuerdo, den e caso aki ta un GPA minimo di 3.0 of mas halto.
Como parti di e acuerdo St. Mary’s College y Gobierno di Aruba a stipula cu lo garantisa un maximo di 20 cupo pa studiantenan di Aruba pa aña. E grupo di studiante aki por conta cu e Residential Scholarship automatico y tambe ta bin na remarke pa e Merit Scholarship.
Pa mas informacion di e acuerdo ta disponibel riba e website di Departamento di Enseñansa www.ea.aw
Minister Hooyboer-Winklaar ta sumamente satisfecho cu a logra extende e acuerdo aki na beneficio di nos studiantenan di Aruba. Mientras tanto ta trahando pa sigui amplia e cantidad di acuerdo pa asina nos studiantenan por tin mas opcion atractivo den Norte America y den region.