LIVERPOOL, Gran Britania- E exposicion Beatles na India, ubica den e sala The Beatles Story na Liverpool y cu ta habri desde diahuebs pa publico, ta recorda e biahe mistico aki di e banda Britanico, cu diabierna ta cumpli cincuenta aña.
E cuarteto di Liverpool forma door di Paul McCartney, John Lennon, George Harrison y Ringo Star, a bay Rishikesh, noord di India, dia 16 di februari 1968, cu e obhetivo di somete nan mes na un sesion di meditacion transcendental. The Beatles tabata wordo compaña pa amigonan, pareha y otro artistanan manera Mia Farrow. Nan a pasa un tempo den e localidad, ya cu Starr y McCartney bandona e retiro prome cu Lennon y Harrison, siendo Harisson e principal propulsor di e biahe.
Awo cu motibo di e cincuenta aniversario di e cual tabata un di e periodonan mas creativo di The Beatles y cu a desemboca den e lansamento di White Album, e sala di The Beatles Story di Liverpoool a reuni material, potret y entrevista di personanan cu a compaña e musiconan pa Rishikesh. Un di e obhetivo mas precia di e muestra, ta cu por wordo bishita den e proximo dos añanan, ta un sitar (snaar instrument casi mescos cu mandolin) cu a pertenece na Ravi Shankar, un di e icononan di musica Indio, cu tabata wordo considera un di e maestronan di George Harrison ora cu esaki a cuminsa experimenta cu e musica oriental. E exhibicion ta inclui tambe potretnan realisa pa Paul Salzman, cu a capta The Beatles durante nan estadia, siendo e persona responsabel di e imagennan mas personal y intimo di e cuarteto durante biahe pa India.
Fuente: https://www.20minutos.es