AHATA un biaha mas ta celebra e apertura di AHATA su exposicion di competencia di obra di arte recicla, cu no ta solamente un competencia, pero ta duna chance na publico general pa bin admira obranan cu e localnan ta traha cu material recicla. Sra. Vanessa Ramussen ta splica.
E exposicion ta habri e siman aki for di 8 or y mei pa 5 or di atardi, y diabierna di 8 or y 30 pa 1 or y mei di merdia, y pa 2 or y 30 lo tin e clausura, unda lo anuncia e ganadonan. Ora un participante ta desea di registra el a haya un formulario di tur e informacion di tur e materialnan cu mag y cual no mag uza, p.e. Mag uza foil, caha di webo, corant, pero ta prohibi pa uza santo, flornan y piedranan natural.
E biaha aki, segun Sra. Ramussen a selecta e obranan. A pidi pa no bin cu un cantidad grandi di obra, pero a pidi pa por fabor, bin cu un cantidad specifico. Asina por duna un poco mas chance pa e publico por admira nan bon.
E campaña aki no tabata dirigi solamente ariba mucha, pero tambe ariba adultonan. Tin masha obranan bunita, den categoria individual amateur, pero nan ta asina bon cu ta parce profesional y ta bay ta dificil pa e huradonan scoge un ganado.
Tambe tin diferente gruponan cu ta consisti di gruponan di coleganan di trabao, y esey ta hopi bunita, pasobra e ta uni e trahadonan asina. Originalmente, segun Sra. Ramussen, e idea tabata pa laga scolnan so participa, pero nan a bin ripara cu a dicidi di bin cu 7 diferente categoria, y asina duna chance na muchanan for di kleuter te cu scolnan secundario.
Aunke e biaha aki no a wak mucho obra haci door di muchanan, y kisas lo mester a parti e categorianan y segun sra. Rasmussen a splica, cu ora cu e proyecto aki caba, nan lo sinta hunto y asina skucha e feedback pa asina otro aña nan por ta mas miho ainda.
E obranan aki ta den exposicion na UNOCA, te cu diabierna 12 di Mei, proximo unda cu nan lo saca e ganado pa 2 or y 30 di merdia.