Tur aña Biblioteca Nacional Aruba ta publica un buki pa su Festival di Buki pa Mucha, e“Regalo di Festival di Buki pa Mucha”. Cada aña tin un tema cu ta e guia pa e autor y ilustrado pa prepara su presentacion pa e muchanan na e diferente scolnan cu cada un ta bishita. Pa 2018 e tema ta ‘Amistad’.
E aña aki Biblioteca Nacional Aruba ta publica un compilacion di storia di escritor di Aruba, Corsou, Boneiro, Surnam y Hulanda. Storia pa mucha den categoria di edad di 4 pa 12 aña. Esaki ta un produccion den dos idioma, Hulandes y Papiamento. Biblioteca Nacional ta gradici tur escritor pa nan bunita contribucion. Y un danki grandi na e ilustrador di e buki ‘Amigonan tur caminda’, artista visual Vanessa Paulina.
Pa laga publico cera conoci cu e “Regalo di Festival di Buki pa Mucha”biblioteca ta presenta un exposicion den su sala grandi titula ‘Vanessa and friends’. Publico ta bon bini na e exposicion di e buki pa mucha ‘Amigonan tur caminda’. E exposicion ta habri for di diaranson 23 di oktober te cu dia 30 di November, henter dia.