Mas cu dos mil persona, hoben y adulto a bishita e exposicion “Aruba, ta nos tur!” di Archivo Nacional Aruba y e actividad cultural organisa pa Amigonan di Archivo dia 18 di Maart ultimo.
E publico por a bishita un bunita exposicion, organisa pa e personal di Archivo Nacional na unda cu a ta duna hopi informacion tocante e mas di 130 nacionalidadnan cu a bin establece nan mes na Aruba. E publico pafor por a disfruta di musica di DJ New Born y di Rincon Boysz, baile door di Candy Dancers, Gucci Dancers, Grupo Folklor di Santa Cruz y Kids to Kids y Grupo nos Cultura, cuminda, cos dushi y a seca garganta na Archivo Nacional.
Bou di esnan cu a contribui cu nan bishita na e exposicion, a rifa diferente premio manera un ‘monster tablet’ di Setar cu a wordo gana pa Sra. Burney Ermstang y diferente certificado di regalo di Superfood cu a wordo gana pa Sr. Keith Stiell, Sra. Delila Davelaar y Sra. Humercinda Wouters. E campaña di ‘Like & Share’ ariba FaceBook tambe tabata exitoso y e premio a wordo gana pa Sr. Richard Helder cu a gana un camera cortesia di Bon Bini Cargo.
Amigonan di Archivo ta gradici tur e boluntarionan cu a yuda cu nan trabou, tur esnan cu bende cuminda y cos dushi, e gruponan di baile y Rincon Boysz pa nan presentacion. E publico cu a bishita Archivo dia 18 di Maart ultimo sin duda ta un publico hopi interesa den historia di nos pais. Un danki special ta bai na e sponsors: Banco di Caribe, Bon Bini Cargo, Ecotech, Romar Trading, Setar Aruba NV, Sleep Comfort y Super Food.
Archivo Nacional y Fundacion Amigonan di Archivo lo sigui traha hunto pa ofrece hoben y adulto mas informacion tocante diferente aspecto di nos historia.
E exposicion lo keda habri pa tur interesado pa e siguiente lunanan, durante ora di oficina di 8.00 a.m. pa 12.00 p.m. y di 1.15 p.m. pa 4.00 p.m. Pa gruponan grandi, por haci un reservacion na telefoon 583-4880. Tur interesado ta bon bini!