Internacional: Ex polis di Minneapolis Derek Chauvin diamars a wordo haya culpabel di asesinato y maltrato severo pa wanta George Floyd na suela cu su rudia riba su nek den un caso cu a causa consternacion y protesta rond mundo. Tabatin reaccionnan furioso pa e acto considera racista y e forma di actua di polis na Merca.
Chauvin di 45 aña por bay cera pa algun decada.
E veredicto a trece alegria den e ciudad. E hendenan mesora a subi cayanan rond di centro, coriendo rond cu pancarta y pitando. Famia di Floyd kendenan a acudi na un sala di conferencia na Minneapolis pa scucha e veredicto a expresa gritonan di alegria.
E hurado di seis persona blanco y seis persona color scur of di diferente descendencia etnico a yega na e veredicto despues di un deliberacion di dies ora durante dos dia. Chauvin a wordo haya culpabel di tur cargo di segundo grado di morto no intencional, asesinato y maltrato pisa.
Cu tapaboca bista no por a mira su reaccion ya cu solamente su wowonan tabata visibel mirando e sala rond. Mesora a kita su condicion di libertad provisional mientras cu na boei a hibe for di e sala.
E sentencia lo ta aki dos luna.