Despues di un exitoso Aruba Art Fair na unda mas di 150 artista local y internae presenta nan obranan di arte y mas di 10.000 persona a acudi na e evento, e organisacion ta inicia cu e ruta pa Aruba Art Fair 2017.
Un di e exitonan grandi durante e 3 dianan di Aruba Art Fair tabata e galeria ArtisA, nomber cu ta deriva for di ARTIS cu ta arte na Latin y A, e prome letter di Aruba.
ArtisA ta situa net dilanti di La Aruba den caya principal di San Nicolas, na unda antes tabata e muebleria di defunto Cheung – Croes. E edificio lo ta e cas pa e obranan di Elisa Lejeuz cu ta participa na e EXPO aki, Peter van de Heuvel cu ta un pintor cu obranan masha singular, Sharina Gumbs un precioso artista di San Nicolas cu pronto lo ta expone su obranan na Miami durante Art Basil na December, Maria Onni di Argentina pero residencia na Aruba y Francis Sling e notorio artista cu a laga un impactante obra di mural atras riba e edificio di ArtisA.
Obranan masha grandi y di colornan magnifico lo decora e murayanan di ArtisA cu ta dedica e tres dianan aki na e 5 artistanan escogi pa ta e promernan cu lo cuminsa cu e ruta pa Aruba Art Fair 2017. E intencion lo ta pa cada luna invita artistanan local cu ta expone nan obranan durante un Mini Art Expo p’asina hiba e comunidad den e mundo di e artista, tresenan serca di nan talentonan y asina hunto yega na e dia espera cu ta ARUBA ART FAIR 2017, cu ta promete di bira algo mucho mas grandi y exitoso.
Mas esaki no ta tur, San Nicolas ta bisti su mes un biaha mas di luz, alegria, musica, poesia, baile y cumindanan exotico y crioyo.
Mo Mohammed lo trece un piesa bibo di poesia, musica y canto cu varios artista di San Nicolas. Mientras cu varios artista lo crea live painting na unda esunnan cu ta bishita tambe por participa.
Leonardo Phillips lo percura pa un tema dedica na San Nicolas y areglo di musica lo ta encarga door di e artista cu ta forma parti di Aruba Art Fairm e exitoso CALETO.
Si bo no a haya e oportunidad pa por a presencia Aruba Art Fair 2016, esaki lo ta bo oportunidad pa mira tur e muralnan di cerca, presencia e obranan di arte di tur e scolnan cu a participa cu nan scol cu paintings di mas di 2 meter grandi.
Y asina lo bo por presencia tambe e obra finalisa riba e mural di Mozaik na e Restaurant O’Neal pa e combinacion perfecto den e mundo di Mozaik cu ta e artista di Chile Isidora Paz y e Arubiana Omayra Silva.
Tres dia di explosion di Arte, poesia, musica, canto, cuminda y mucho mas. Iniciando diasabra y diadomingo pa 7 or di anochi te cu 11 or.
Entrada completamente gratis. Bishita nos www.Arubaartfair.com y nos facebook page.