CIUDAD DE MEXICO, Mexico- Autoridadnan a informa cu 76 persona a resulta herida door di e explosion na Hidalgo.
Autoridadnan Mexicano a comunica cu e cantidad di mortonan causa door di e explosion di un oleoducto di Petroleros Mexicanos (Pemex) na Hidalgo, a aumenta na 66, mientras cu e cantidad di personanan herida ta di 76.
Entre e heridonan tin 73 homber y tres muhe cu diferente nivel di gravedad, segun e gobernador di Hidalgo, Omar Fayad. E funcionario a atribui e explosion na e localidad di Tlahuelilpan door di ‘huachicoleo’, es decir e hortamento di combustible.
Segun autoridadnan, tabata tin un acumulacion di entre 600 y 800 persona den cercania di e oleoducto algun minuut prome cu e explosion, cu segun informenan a cuminsa door di un escape.
“Nada no lo stop nos”
Segun e presidente Mexicano, Andres Manuel Lopez Obrador, e imagennan di hende cu hemchi, tobo y otro recipientenan pa saca gasolina ta papia pa nan mes, e asunto aki “desgraciadamente a extende den henter e zona petrolero”, ya cu caminda tin tuberia ta pasa, e ta un hecho frecuente.
E presidente a ofrece su condolencia na e afectadonan y a adverti e poblacion di cu e ta expone e riesgo di bira victima di un suceso similar di loke a sosode na Hidalgo, si nan sigui cu e practica di robo di combustible.
Advertencia na e poblacion
Fayad, di su banda, a indica cu e personal militar cu a yega na e sitio pa banda di 5 or di atardi, a bin topa cu’n multituda cu tabata recolecta combustibel door di un fuga (leak) cu a wordo ocasiona door di un boramento ilegal di e tubonan.
E funcionario a haci enfasis di cu e soldaatnan encarga pa cera e zona a pidi e personanan presente na e sito pa bandona e sitio pa motibo di e peliger cu por presenta door di e situacion, un solicitud cu no a haya oido di parti esunnan presente na e sitio.
E gobernador tambe a expresa su condolencianan pa cu e victimanan. Na mes momento, autoridadnan a recorda esunnan cu e delito asocia cu vandalismo contra di e tipo di instalacionnan estatal por wordo castiga cu entre 20 pa 30 aña di prizon.