Explorers di Grupo Scout Santanero (GSS) y Grupo Scout St. Paulus-Michael (GSSPM) a reuni dialuna na Aeropuerto Internacional Reina Beatrix pa asina biaha pa Orlando, Florida naunda nan lo pasa un siman na Scout Camp La-No-Che. E biahe aki ta specialmente prepara pa nos Explorers (miembronan entre 15-18 aña) por train, siña y asina avansa den e rekesitonan di e metodo scout door di experencia y competi den diferente actividadnan extremo.
Durante dicho siman nos Explorers lo participa na Kayaking Challenge, Ziplining, Rappelling, Extreme Obstracle Course, Rifle Shooting, Archery, Hiking Adventures, Teambuilding Challenges y finalmente ATV Trail Riding. Door di participa na e tipo di actividadnan aki ta logra complementa e desaroyo general di e hobennan. Na banda di supera nan mes, nan ta siña traha den ekipo y ta desaroya nan skills di liderazgo. Alavez ta promove condicion fysico y resiliencia.
GSS y GSSPM ta desea tur miembro di Explorers Team: Blaze Klementowski, Ismara Luckhoo, Jayden Arends, Kenneth Henriquez, Shaun Arends, Zjon Greaux y nos Team Presidents Chris Semerel y Jaylan Ridderstaat hopi exito cu e actividadnan y challenges na Orlando.
Hunto cu nos Explorers lo biaha como Lider di Delegacion – Chris Lake y Groepsleider di GSS – Rianne Luckhoo-Korsen.
Nos ta haci uzo di e oportunidad pa expresa nos palabra di gradicimento na tur sponsors, mayornan, colega lidernan, famianan y demas personanan cu di un of otro forma a aporta pa haci e biahe aki posibel pa nos Explorers Team. Masha danki di curason pa boso aporte na desaroyo di nos miembronan.
Scouting ta brinda un desaroyo holistico na e hoben pa medio di su metodo educativo cu ta enfoca riba desaroyo Fysico, di Caracter, Creativo, Afectivo, Social y Spiritual. Durante nos encuentronan semanal, campamentonan, actividadnan, trainingnan di drumband nos hobennan ta pasa den diferente retonan y proceso di formacion pa por ta miho ekipa y asina Prepara pa Bida! Di mes forma Scouting ta desaroya hobennan cu capacidad di liderazgo y pensamento critico y constructivo.
GSS y GSSPM ta miembro di Scouting Aruba, e asociacion nacional cu ta coordina e 12 gruponan scout local rond di Aruba cu ta consisti di 450 miembro actualmente. Funda desde 23 di april 2000 actualmente cu 25 aña dirigiendo e movemento na bienestar di nos pais Aruba.
E movemento scout na Aruba ta existi pa mas di 95 aña caba y cu bista riba futuro lo sigui brinda Scouting di calidad halto na nos isla basa riba e metodo scout y e asociacion su plan strategico pa medio di lidernan cu compromiso y responsabilidad pa guia nos miembronan.
