Diadomingo 7 di Mei a tuma lugar e di cinco edicion pa e aña aki di Experience San Nicolas
unda un cantidad grandi di e comunidad di Aruba a bishita Sunrise City. E biaha aki Experience San Nicolas a wordo organisa cu e tema di Dia di Mama.
Na Museum of Industry tabata tin un workshop exitoso unda cu e participantenan por a dorna artefactonan di cushina cu mosaico. Esaki a wordo organisa den pasado caba door di Espacio Azul conhuntamente cu Atemosa y door cu tabata tin un interes asina grandi a dicidi di ripiti esaki pa tur esunnan interesa. Na final di e workshop e participantenan por a drenta museo pa asina conoce un tiki mas over di Aruba su historia.
Personanan cu tabata interesa pa pasa bishita Museum of Industry y Community Museum por a haci esaki pagando solamente mita di prijs. En conexion cu e tema di Dia di Mama, tur e mamanan cu a pasa bishita e museonan tabata participa automaticamente den e rifa di e dia aki. Un biaha mas danki na The Old Cunucu House, Aquanails y Spa del Sol na Playa Linda pa haci e Experience San Nicolas aki uno mas special pa e mamanan.
E Creative Center di Cosecha tabata yena cu participantenan cu kier a conoce e arte di Origami. E participantenan a mustra hopi entusiasmo y a traha mas cu solamente e flor pa dia di mama. E tayer di arte di ‘paper folding’ Origami a wordo duna door di artista multidisciplinario Derick Chong. Cosecha kier a gradici Derick, tur e participantenan di e Origami workshop y tur cu a pasa check un obra di arte unico den e tienda di Cosecha pa por duna dia di mama.
Massive 103.5FM tambe a aporta diadomingo cu a pasa na Experience San Nicolas cu musica pafo pa asina crea un ambiente familiar den cayanan di mainstreet San Nicolas.
Tabata tin diferente tienda y restaurant habri den San Nicolas cu tambe a forma parti di Experience San Nicolas y cu a wordo bon bishita. Esakinan tabata, entre otro O’Neil Caribbean Kitchen,Topaz Takeaway, Joy’s Restaurant, El Gallo Rojo, WEMA, Alankar, JM Enterprises, La Aruba, Maggy’s y Aruba Store.
Keda pendiente di e pagina di Facebook di Experience San Nicolas pa haya sa mas informacion over di e siguiente edicion cu lo tuma lugar diadomingo 4 di juni di 10:00am – 2:00pm cu e tema di Dia di Tata. Bin disfruta un diadomingo familiar hunto cu nos na Sunrise City.