Diadomingo proximo, dia 9 di Juli, lo tuma luga Experience San Nicolas, Summer Edition. Tumando na cuenta cu ta periodo di vakantie na Aruba, e cayanan di San Nicolas ta ofrece diferente actividadnan pa henter e pueblo di Aruba cu ta bishitando ariba e dia aki.
Espacio Azul conhuntamente cu Museo di Industria ta planea un actividad dirigi pa mucha, amigonan y famia. E actividad aki tin como meta pa e participante realisa con importante Aloe tabata ta na nos Isla. Alabes ta descubri con el a bira un di nos industrianan di masha balor cu impacto global. Mientras cu den un manera creativo ta pinta pochi di mata unda lo planta nan mesun aloe aden. Esaki ta bira un articulo personal cu por hiba cas y cuida y wak su crecemento.
Espacio Azul ta den preparacion cu tur detaye pa e actividad aki bira uno unico! E tourguidenan di Museum of Industry lo duna tur participante un tour den Museo. E parti artistico ta wordo duna door di e artista Natalia Koolman cu lo guia cu e pintamento di cada pochi di mata. E mata nan di Aloe cu wordo planta ta donacion di e
compania di Aruba Aloe Company.
E actividad completo tin un duracion di 2 ora y ta wordo organisa den tres grupo pa duna cada participante e atencion debido. Por inscrirbi na [email protected] of jama of whatsapp nos na 5935509. Por hasi escogencia di e siguiente orarionan:
10:00 am, 11:00 am, 12:00 pm.
Nos ta warda abo cu bo amiga of amigo pa e curso unico aki.