Diadomingo awo, dia 7 di Mei 2017 un biaha mas lo tuma luga e evento Experience San Nicolas, cual lo ta enfoca ariba Dia di Mama. Lo bay tin diferente actividadnan rond di San Nicolas cu tin di haber cu Dia di Mama. Esaki lo ta di 10 or di mainta, te cu 2 or di merdia.
Na Museum of Industry como tambe Community Museum, lo bay tin rifa specialmente pa e mamanan cu bishita e museonan. Algo special e biaha aki na Museum of Industry, cu lo tin un workshop di Mosaik. Esaki den colaboracion cu Espacio Azul y Atemosa, cu Endita Werleman. Nan lo traha un workshop specialmente pa e mamanan, unda lo traha algun arte pa regala mama ariba su dia.
E workshop lo bay ta di 10 or pa 12 or di merdia. Registracion ta posibel na e mail cual ta [email protected] of yama 593-5509 registra pa e workshop y tambe participa. Ta importante pa haci esaki di antemano, pa sigura bo espacio.
Na e museonan entrada lo ta mita prijs, na Community Museum lo bay tin Gladys, cu lo hibao bek den tempo. Tur persona cu bishita Museo lo bay tin rifa specialmente pa e mamanan. Esaki ta cortesia pa Old Cunucu House, Aquanails Spa, y Spa del Sol y lo rifa algun premionan special pa e mamanan cu bishita e museonan e dia aki.
Si den caso cu tin un grupo lo ta bon pa avisa di antemano pa asina haci e preparacionnan. Museo ta habri pa tur hende, pero pa e workshop si ta importante pa registra na tempo pa por tin suficiente luga. E prijs cu ta paga pa workshop ta inclui cuminda y bebida, como tambe entrada pa e museo.
Ta importante pa bisa cu e premionan lo wordo saca dialuna, dia 8 di Mei, y por check e resultado ariba e Facebook page di Museum of Industry.