Diadomingo 4 di Juni 2017 a tuma lugar e di seis edicion pa e aña aki di Experience San
Nicolas unda un cantidad grandi di e comunidad di Aruba a bishita Sunrise City. E biaha aki
Experience San Nicolas a wordo organisa cu e tema di Dia di Tata .
Den cura di Museum of Industry a ripiti e tayer di Mosaico mirando cu tabata tin hopi interes
pa e workshop aki. Un bunita colaboracion entre Sra. Enrita Werleman di Ate Mosa y Espacio Azul. Na final di e workshop e participantenan por a drenta museo pa asina conoce un tiki mas over di Aruba su historia.
Na Nicolaas Store a tuma lugar e prome edicion di compartimi di cual e bishitantenan a pasa
un rato relaha den un ambiente di comparti. A cubri e recuerdo di Sr. Dufi Kock su infancia y
bunita recuerdonan di un bario cu ela crece aden. A papia di con San Nicolaas a lanta y e
desaroyo cu Lago a trece cune na aña 1924. Tambe a elabora ariba e pregunta cu a ser
contesta den e prome edicion aki. Un danki na Sr. Renwcik Heronimo y Sr. Dufi Kock cu a
sigur a hiba nos bek den tempo.
Personanan cu tabata interesa pa pasa bishita Museum of Industry y Community Museum
por a haci esaki pagando solamente mita di prijs. En conexion cu e tema di Dia di Tata, tur
bishitante cu a pasa bishita e museonan tabata participa automaticamente den e rifa di e dia
aki. Ariba nos pagina di Facebook por mira tur ganador. Un biaha mas danki na Clinica
Chirpractico Van Putten, Fresh CUTZ Barbershop, Kamini’s Kitchen y Jads Dive Center Aruba.
Cosecha kier a agradeci primeramente tur cu a participa na e workshop di King Lie-Kwie den e Creative Center di Cosecha na San Nicolas. Cu yen entusiasmo y gana di siña,
participantenan a pinta cu verf un piesa pa Dia di Tata. Cosecha kier a bisa danki tambe na
King, cu a guia e grupo mixto cu yen energia y a sa di duna cada participante e atencion
adecua. Un danki tambe ta bai pa Seasons and Beyond na Savaneta cu a yuda cu premio pa e raffle di dia na Cosecha. E ganador di e raffle ta Shendall Ras.
Tabata tin diferente tienda y restaurant habri den San Nicolas cu tambe a forma parti di
Experience San Nicolas y cu a wordo bon bishita. Esakinan tabata, entre otro O’Neil
Caribbean Kitchen, Joy’s Restaurant, El Gallo Rojo, WEMA, Alankar, JM Enterprises, La Aruba, Maggy’s, Aruba Store y Jads Dive center y Rum Reef Bar & Grill.
Keda pendiente di e pagina di Facebook di Experience San Nicolas pa haya sa mas
informacion over di e siguiente edición cu lo tuma lugar diadomingo 9 di Juli di 10:00am –
2:00pm cu e tema di Summer Vibes. Experience San Nicolas ta wardabo.
