San Nicolas tin hopi pa ofrece tanto pa nos localnan como nos turistanan y pesey a bin cu e idea pa start Experience San Nicolas. Di e forma aki ta duna mas atencion na e experiencia unico cu ta reina akinan. Esaki ta un bon oportunidad pa bin conoce mas di San Nicolas den ceno familiar. San Nicolas ta asina rico na cultura, historia y arte culinario representa door di e diferente nacionalidadnan cu ta biba of cu a yega di biba aki na San Nicolas den pasado. Tur e edificionan den nan mesun forma tin nan historia y esaki tambe ta bin dilanti durante “Experience San Nicolas”.
Experience San Nicolas ta tuma luga tur prome diadomingo di luna y e di tres edicion lo tuma luga diadomingo venidero dia 5 di Februari di 10am pa 2pm.
Diferente tienda y restaurantnan manera Wema, El Gallo Rojo, Alankar, JM Enterprises, La Aruba, Joy’s Restaurant, Aruba Store y O’Niel Restaurant lo ta habri pa duna servicio na tur bishitante.
Como tabatin gran interes den workshop di Mosaïek riba boter di perfume na Espacio Azul, organisa conhuntamente cu Maggy’s y dirigi door di Atemosa, esaki lo wordo ripiti diadomingo aki.
Bishitantenan por bishita Museo di Industria y Museo di Comunidad pagando mita di prijs y tambe lo tin un seccion special pa mucha na Museo di Industria.
Artista Luis Villegas, lo duna un workshop unda publico lo traha su mesun publicacion den estilo Fanzines, usando multimedia, na Cosecha San Nicolas. Edad pa participa ta 7 aña bay ariba y esaki lo ta completamente gratis.
Subi e pagina di facebook di Experience San Nicolas y keda pendiente di tur updates di e di tres edicion di Experience San Nicolas.