Diadomingo ultimo, Museo Arkeologico Nacional Aruba, a tene su ultimo actividad publico pa e aña aki, den un ambiente dushi di fin di aña, den colaboracion cu Stichting Monumentenfonds Aruba y Multifunctionele Accomodatie Paradera.
Participantenan di e expedicion arkeologico a subi bus y auto pa haci e recorido na sitionan arkeologico, cuminsando na MFA na Paradera. Akinan participantenan a ser deleita cu un bunita show di Tanchi Betty y grupo di baile rosea cultural y Nini cu grupo di baile Cadushi Largo, mientras cu registracion tabata tumando luga. Durante e recorido den bus participantenan a haya informacion tocante nos herencia cultural y na cada sitio arkeologico e expertonan den arkeologia a conta tocante e sitio specifico aki. Algun boluntario a percura pa dushi ambiente di pasco den e bus cu musica y canto. E sitionan cu a ser bishita e aña aki tabata riba tereno priva di cual e doñonan a duna nan colaboracion pa habri nan pa publico pa e dia special aki. Pa esaki Museo ta gradici Stichting Eliezer, Sr. Schoonen y Notaris Marjon Tromp profundamente.
Un di e stopnan di e recorido e aña aki tabata e exitoso “Fiesta di Cunucu” cu Stichting Monumentenfonds a organisa pa di cuater biaha caba. Akinan participantenan a pasa un dushi rato cu bunita show y tabata tin e oportunidad pa bishita e cas di cunucu y cumpra un dushi pasa boca y algo di bebe y saca potret cu e Wantomba pa asina participa na e campaña di Stichting Monumentenfonds.
Participantenan a reacciona hopi contento y satisfecho y esaki ta pa un gran parti danki na e voluntarionan fantastico cu a yuda haci e di cuater expedicion arkeologico uno exitoso asina. Tambe un danki na De Palm Tours cu a pone 3 bus disponibel, sin cual no lo tabata posibel pa haci e expedicion e aña aki. Alavez danki na Balashi N.V. cu a pone boter di awa disponibel pa e boluntario y trahadonan di museo. Museo Arkeologico Nacional Aruba ta hopi contento y hopi gradicido na e colaboracion cu Stichting Monumentenfonds specialmente Mircla Nava y na MFA Paradera , Andres (Modechi) Werleman cu a yuda masha hopi cu e parti organisatorio. Tambe nos ta gradici e participantenan pa e bon acogida atrobe. Keda pendiente pa nos edicion aniversario otro aña!