Recientemente a tuma luga e seminario “Explosion Karate II” organisa door di Asociacion Arubiano di Karate -Do Shotokai, dojo Shocokan bou guia di Sensei Alberto Gonzalez Lujan den Centro Deportivo Betico Croes.
Amantenan di karate a bini hunto y a disfruta di un atardi yena di hopi tecnica y recomendacion duna door di e gran maestro, Shihan Victor Garrido (di 7 Dan) di e Federacion Internacional Shotokai. Su persona a expresa di ta contento di por ofrece un 2do seminario na Aruba. Esaki ta un oportunidad pa comparti tur su conocemento y pa conoce poco poco cada karateka di Aruba.
Hopi bunita tabata e prestacion di cada karateka durante e seminario. Tabata tin hopi entusiasmo durante e seminario. Ta spera pronto di topa otro bek na cualkier otro seminario di karate of cualkier otro campeonato. Manera a wordo menciona na comienso y durante e seminario, no tin nada mas bunita ora diferente scol di karate ta bini hunto pa train loke mas hopi nan ta gusta.
Pa Shotokai Aruba dojo Shocokan tabata un honor pa un biaha mas conta cu e presencia di Shihan Victor Garrido na Aruba. Sensei Alberto Gonzalez Lujan ta gradici tur instructor, tur karateka, tur mayor, tur federacion compañero y tur boluntario cu a yuda pa haci e seminario ‘Explosion Karate II’ un realidad.