Recientemente Aruba Karate Bond (AKB) a participa na e Campeonato “ABC” na Club Soho na Boneiro. Esaki ta un campeonato cu anualmente ta wordo organisa y unda ta haci un rotacion bou di e islanan. E biaha aki a toca turno na Bonkarate Bonaire (bou di presidencia di “Sensei” Peter Silberie y su team) pa organisa e campeonato “ABC” 2022. Participantenan a yega for di Aruba, Corsow y Surinam pa join esnan na Boneiro. Cu un total di 75 participante e campeonato a ranca sali for di 9 ‘or di mainta cu un reunion pa tur arbitro y coach. Durante e reunion aki a repasa tur regla y stipulacion di e campeonato. Pa 10’or a tuma luga e bunita desfile di tur e participantenan.
Team Aruba
Aruba a wordo representa door di Alejandro Gonzalez Lujan y Juan David Velasquez. Alejandro Gonzalez Lujan ta un atleta di 18 aña di edad. Cu su 4 aña el a cuminsa tuma les di karate, a keda practica y te awe karate ta un di su pasionnan mas grandi. Aparti di esey, Alejandro Gonzalez Lujan ta gusta musica. Juan David Velasquez ta un atleta di 21 aña. Tempo cu e tabata tin 7 aña el a cuminsa practica karate. Te dia di awe Juan David Velasquez ta practica y gusta karate. Banda di karate, e ta dedica su mes shen porciento na su estudio.
Resultado exitoso
Alejandro Gonzalez Lujan a participa den categoria Senior Kata (exposicion di tecnica di karate), Senior Kumite +84 kg (pelea, bringamento) y Open Kumite. E competencia tabata fuerte unda e atleta aki a bringa den total 5 biaha. Cu su agilidad den bringamento el a keda victorioso: dos medaya di oro, uno di brons y e trofeo di oro pa e atleta cu e puntonan di mas halto den henter e campeonato. Juan David Velasquez a participa den categoria Senior Kata (exposicion di tecnica di karate) y Open Kumite. Cu un presentacion fenomenal den tecnica y en total 3 pelea Juan David Velasquez a gana dos medaya di plata y un medaya di brons.