E delegacion di cabay, jinete y amazona di Aruba tabatin un actuacion destaca na Corsou durante fin di siman cu a pasa. Diasabra, e tres cabaynan di Aruba a logra premio den nan respectivo competencia.
Oasis de los Sauces, di Criadero Hermanos Bruin, a obtene e prome luga den su categoria y a wordo nombra como Gran Campeon den e modalidad di Trocha.
Den e modalidad di Paso Fino, Suavidad de la Siberia, di Criadero W. a logra e prome luga den su categoria y a corona como Gran Campeon Reserva. Secreto de Magico di famia de Cuba, tambe a obtene un prome luga den su categoria y a keda como prome finalista den e campeonato.
Diadomingo tabata turno di e seis jinete y amazona di e delegacion, kendenan tambe a logra premio, obteniendo un total di tres medaya di plata pa Aruba. Den e categoria di Amazonas infantil, Zaria de Groot a gana un medaya di plata y Emilie Lomans a keda na di cuater luga. Den Jinetes Junior, Zachary Coffie tambe a obtene un medaya di plata den su categoria. Den Amazonas Juvenil, Xielle Koolman a logra un di tres luga y Carolina de Cuba un di cuater luga den su categoria di Amazona Aficionada. Finalmente Aruba a cera cu otro medaya di plata, obteni pa Jenilee de Cuba den e categoria di Amazonas Mayor.
Pa Zaria, Zachary, Xielle y Carolina, esaki tabata na prome biaha compitiendo na Corsou. Felicitacion pa tur pa un excelente representacion na nos hermana Isla Corsou.
