Diasabra dia 5 di November pasa un grupo di Toastmasters y invitadonan a reuni pa prome biaha durante e Open House di e Gilberto Francois Croes Toastmasters Club. Esey a tuma lugar den e private room na Bright Bakery. E Open House tabata un exito rotundo! Tres tremendo descurso a wordo duna door di Clementia Eugene, profesora na Universidad di Aruba, Arkitecto Raffy Kock y Docente di IPA y Internacional Public Speaker Drs. Olivia Groeneveldt. Durante e di dos seccion di e reunion, Table Topics, e famoso dietista Angelique Salsbach a dirigi algun pregunta cu e voluntarionan mester a contesta directamente. E parti aki a laga pone tur hende hari! Na final tur participante y e reunion mes a wordo evalua door di un team di evaluadornan bou guia di Directora di Area 6, Señora Rubina Bernadina.
“E meta di e reunion aki tabata pa laga mas hende sera conoci cu a programa Educativo cu Toastmasters ta ofrece na tur hende di 18 aña bay ariba, pa nos por yega na e 20 hende cu ta rekeri pa por habri un club nobo. Corsou tin 18 club activo y Boneiro 2 Club activo y a gana di 2 luga durante e District speech contest na Mei, asina Co-Fundador y Toastmaster of the Meeting Mireille Sint Jago a splica. Hunto cu Rosanna Ridderstaat e ta trahando pa mas cu 6 luna pa lanta e club nobo aki. “Aruba tin 4 Club di Toastmasters y awor nos ta lantando grupo numero 5 den honor di un di e miho lider y oradornan cu Aruba a yega di conoce: Betico Croes.”, asina co-fundador y candidata pa Vice Precidente di Miembrecia Rosanna Ridderstaat a splica. Nos falta algun miembro ainda pa yena e 7 posicionnan den directiva. Te awor nos tin como candidato Candidato pa Presidente di e Club nobo: Marcolino (Nilo) Croes, candidata pa Vice-Presidente di Educacion: Mireille Sint Jago, candidato pa Tesorero: Seferino (Sa) Bislick. Nan tin e trabou duro pa sigui lucha pa habri e club aki prome cu fin di luna di November. E luna den cual nos ta conmemora e di 30 aña di morto di Betico Croes, cu apesar di ta un maestro y politico tambe tabata un Toastmaster. Un gran lider, cual e efecto di su vision riba educacion, comunicacion y pueblo di Aruba ainda ta un realidad. E directiva kier extende un invitacion na tur esnan cu tambe ta reconoce e beneficio di un Toastmasters Club, pa acudi na Bright Bakery tur diasabra di November entre 3-5’or pa haya mas informacion of pa inscirbi como miembro. E prome 3 luna ta costa 175 florin y cada luna despues ta costa 40 florin pa luna. Na esnan cu kier siña duna presentacion na un manera creativo y profesional. Esnan cu kier practica e idioma Ingles of Papiamento durante nan discursonan. Nos ta invita tur esnan cu tin miedo di papia dilanti di un grupo, pero tambe esnan cu ta gusta yuda organisa reunionnan, educa nan mes y comparti nan conocemento y experticio cu e otro miembronan. No laga e oportunidad unico aki pasa bo voorbij pa abo bira un ‘founding member’ di e Gilberto Francois ‘Betico’ Toastmasters Club.
E organisadornan kier extende un palabra di danki na tur e Toastmastersnan cu a yuda haci esaki posibel door di sign up pa un rol activo durante e Open House meeting: Marcson Kelly, Lynie Hassell, Raffy Kock, Clementia Eugene, Olivia Groeneveldt, Rubinah Bernadina y Angelique Salsbach. Nan ta hopi contento cu a haya bishita y ayudo di tur 4 Toastmaster Clubs na Aruba: Aruba TMC, Yamanota TMC, Arikok TMC y University of Aruba TMC. Tambe un palabra di danki na nos digno invitadonan. Tur e miembronan nobo cu a inscribi diasabra ta mas cu bon bini. Hopi exito riba e caminda educativo cu boso a scoge. Cu pronto e Gilberto Francois Toastmasters Club lo bira un realidad.