Den cuadro di ASU Olimpiada, diasabra 20 di oktober ultimo tabatin e “Open Aruba Karate Championship 2018” di Aruba Karate Bond, cual a tuma luga na Centro Deportivo Betico Croes. E campeonato a conta cu un total di 60 participante di Aruba, Boneiro, Corsou y Venezuela.
Resultado Aruba Karate Open 2018 20 di october 2018
Como preparacion pa e campeonato, a conta cu e bishita di ‘sensei’ Edgar Albakian di Venezuela kende ta 6 Dan Karate Do Genbukai, miembro di e federacion Venezolano di karate (FVKD) y arbitro ‘A’ di World Karate Federation (WKF). Su persona a duna dos tremendo seminario, esta uno tocante ‘reglamento 2018 WKF’ pa tur instructor y uno tocante tecnica di ‘kumite’. Ambos seminario tabata hopi bon y a duna un bista amplio di tur e detayenan cu e arbitronan ta evalua durante e campeonato.
A reina hopi energia durante e campeonato. Cu e presencia di e arbitronan local hunto cu e arbitronan di Venezuela, esta Edgar Albakian, Carlos Vasquez y Jesus Lugo, tur karateka a sinti e preshon pa mustra e miho tecnica cu nan tin. E campeonato a conta tambe cu e bishita di ‘sensei’ William Millerson, vice-presidente di World Karate Federation, kende a dirigi algun palabra di motivacion na tur presente. Presidente di Aruba Karate Bond -‘sensei’ Felix Tromp- ta contento cu e ‘Open Aruba Karate Championship 2018’.
Un danki special pa Aruba Sport Unie (ASU), Stichting Sportsubsidie Aruba (SSA), Comite Olimpico Aruba (COA), Lotto pa Deporte, scolnan di Boneiro, Corsou y Venezuela. Tambe un danki na tur boluntario cu a yuda. Un pabien special pa tur medayista y karateka cu a participa.