Diasabra ultimo, den un Club Caiquetio repleto, movimento RAIZ su prome FAMILY FUN BINGO NIGHT a conta cu participacion di un publico grandi cu for di trempan a yega pa reserva nan asiento.
Intencion principal di e evento tabata pa recauda fondo pa di e forma aki RAIZ por inverti den e infrastructura y logistica di nan movimento. E parti di desaroyo personal pa medio di un academia di politico lo fungi como guia y preparacion di e team, un decision necesario y sumamente importante ora kier eleva e calidad di gobernacion di nos pais riba un base continuo. Sr. Ursell Arends, lider di e movimento, a dirigi su mes na e publico presente brevemente y a splica tocante e destinacion di e fondonan adkiri. RAIZ ta kere cu e manera pa cambia e relacion entre politica y pueblo, ta door di comunicacion y practica habri, y transparente.
RAIZ kier a yama danki na tur esnan cu tabata presente, cu a contribui cu nan asistencia o compra di ticket. Un danki especial na tur boluntario cu a yuda haci e anochi aki posibel cu nan colaboracion. RAIZ ta contento cu e gran apoyo y sosten ricibi cu ta permiti e movimento pa sigui profila su plataforma dinamico y presenta ideanan innovativo na comunidad di Aruba. Semper respetando opinion y identidad di cada ciudadano cu tin como meta comun: e mihor pa nos pais.
Keda pendiente pa mas informacion y e ultimo desaroyonan di movimento RAIZ via medionan social y e website: www.raizaruba.com