Pa e di segundo aña consecutivo e facultad di FHTMS di Universidad di Aruba, y e Hospitality and Tourism Unit di EPI a disfruta di sponsorship, guia y apoyo di Divi Resorts Aruba pa un anochi di cuminda y baile global na Universidad di Aruba.
E studiantenan di ambos scol, dirigi pa Chef Ehecutivo Paul Zijlstra cu ta e autoridad culinario di Divi y Tamarijn All Inclusive, a colabora na e cena cu baile aki, cu a tuma lugar riba e bunita propiedad di e universidad.
Freddy Zedan, Director di Food & Beverage na Divi & Tamarijn Aruba All Inclusive, a crea un set-up interesante den e hardin cu stacionnan interactivo, atendi pa e studiantenan di ambos scol, den colaboracion cu Arion Wine Company y Divino Wine & Spirits, Aruba Trading Company, Romar Trading y La Cava, trahando hunto pa hiba e studiantenan na e siguiente nivel di mixology y bartending.
E studiantenan tambe a prepara un experiencia di tasting pa mas di 100 invitado, y Chef Zijlstra a informa cu e la bai e pre-evento di EPI pa un tasting, y aunke e receta di e propio studiantenan tabata rekeri un poco ekilibrio, en general e tabata contento y e la confirma cu e nivel di e experiencia culinario ta evidente, y como tal e recetanan y presentacionnan di cuminda a pasa e inspeccion cu exito.
Invitadonan a disfruta di un welcome cocktail, entretenimento musical cu e banda Bamboo, stacionnan di cuminda Hulandes, Italiano y Mediterraneo, cos dushi y koffie.
E evento tabatin dos proposito. E la sirbi como un les poni den practica caminda cu e studiantenan a organisa un fiesta di berdad, desde e concepto di e menu te cu e preparacion di e cuminda, e marketing, set-up, servicio y break down, como parti di nan curriculum educativo. Tambe e la ofrece e oportunidad pa recauda fondo caminda cu tur e placa cu a wordo colecta a wordo duna na e studiantenan di EPI y FHTMS pa facilita nan excursionnan y actividadnan culinario den exterior.
Decano John Wardlaw a informa cu e studiantenan ya caba a bai un experiencia di winter sport, pa asina siña tocante turismo den clima friu, locual a habri wowo di e studiantenan local di Aruba na diferente aspecto di hospitalidad global.
E experiencia global di cuminda y bebida a wordo apoya pa e facultadnan di e scolnan y e industria turistico di nos isla, encabesa pa Divi Resorts. Otro patrocinadornan generoso tabata Angelo Koolman, Sharp Productions, Sunny Ray, Gianni´s Group y Vibrations PR.
