Despues di e exitoso diadomingo ultimo na Noord, e popular proyecto di Container den Bario pa e siman aki. Diadomingo awor 4 di December, Dakota ta na turno. E sitio exacto lo ta e parkeerplaats di Don Elias Mansur Ballpark. E orario lo ta di 8’or di mainta pa 2’or di atardi.
Riba tur diadomingo, ATA y Serlimar lo ta den e districtonan mas grandi di Aruba, ofreciendo tur cas den nos comunidad e oportunidad di prepara y haci limpiesa pa fin di aña. Probecha y no warda te ultimo ora pa cuminsa cu e limpiesa mas grandi di aña!
Milieustraat
Cu e generoso sosten di ATA, dicho proyecto lo wordo ehecuta door di Serlimar den e concepto di un “milieustraat” of “caya di medio ambiente”.
En breve, e “Caya di Medio Ambiente” ta encera e deposito di grofvuil den container specialmente pa e publico general.
Grofvuil ta encera e siguiente desperdicio di cas: desperdicio di cas general y artefactonan grandi manera wasmashin, meublenan bieu y como tambe desperdicio di hardin (mata, yerba, troncon etc.). Lo ta bay tin supervisornan presente na tur momento, specialmente pa dirigi y asistibo den esaki y nos ta conta cu e cooperacion di un y tur.
Nos ta den pleno temporada di awasero atrobe pues elimina tur criadero, haci limpiesa na cas y den bario. Ta miho preveni awor y cu e proyecto aki nos ta yuda y encurasha bo persona pa haci esaki.
Duna Aruba e miho di nos
Ban duna Aruba e miho di nos. Un isla limpi ta y lo keda un prioridad importante pa ATA. Esaki, tanto pa nos bishitantenan como nos mes. Cu e punto di salida aki, ATA ta sigui sostene Serlimar y e noble proyecto Milieustraat pa asina ofrece Aruba un manera facil, gratis y responsabel pa deshaci di desperdicio di cas grandi (grofvuil) pa fin di aña. Door di duna prome na comunidad y pone containers disponibel, lo motiva tur habitante pa (man)tene rond di nan cas limpi y asina contribui pa mantene e bario mes limpi. Pa mas informacion, comunica libremente na 5245080 of bishita nos Facebook/serlimararuba.