Exitoso Aruba ABC Open Karate Championship

Recientemente Aruba Karate Bond a tene su exitoso prome campeonato di aña yama ‘Aruba ABC Open Karate Championship’. Despues di e bunita desfile di cada scol di karate di Aruba, igualmente cu e team di Boneiro y Corsow, a sigui cu e motivante speech di presidente ‘sensei’ Felix Tromp dirigi na publico presente. Como sorpresa a dedica e campeonato aki na ‘sensei’ William Millerson, presidente di Parlamento di Corsow y den mundo di karate conoci como instructor di Wado Karate, vice-presidente di e Federacion Mundial di Karate (1998-2014), vice-presidente di PKF (Panamerican Karate Federation) y actual vice-presidente di CKF (Caribbean Karate Federation). ‘Sensei’ William Millerson a fungi e ultimo añanan como e brug pa Aruba Karate Bond, kende hunto cu COA, a percura pa karate ta regresa den mundo di karate international. Su persona a ricibi e plakaat di reconocimiento for di man di señora Nicole Hoevertsz di Comite Olimpico Aruba. Despues a yama un pa un e seleccion. Juan David Velazquez, Janilaine Bello y Alejandro Gonzalez Lujan a ricibi un caluroso aplauso di e publico pa nan resultadonan exitoso den 2019.
E campeonato a conta cu un total di 70 participante. Cu hopi emocion a ranca sali cu e categoria ‘rambuho’, esta e karatekanan di edad di 4 pa 6 aña. Tur a haci nan maximo esfuerzo y na final a ricibi nan medaya di participacion. Por a nota un gran cantidad di muchanan entre 9 y 15 aña hopi entusiasma y a duna e miho di nan mes. E punto culminante tabata e tremendo batayanan den categoria ‘senior dama y cabayero’ na unda Aruba a keda cu tur 2 medaya di oro den ‘kata’ (combate imaginario) y medaya di plata den ‘kumite’ (combate real).

Aruba Karate Bond ta felicita tur karateka. Na mes momento ta gradici tur karateka (specialmente team Boneiro y Corsow), tur instructor, tur arbitro, tur mayor, tur boluntario, Minister Dangui Oduber, Stichting Sportsubsidie Aruba, Aruba Sport Unie, Fundacion Lotto pa Deporte, Comite Olimpico Aruba, Al Performance Training, Setar NV, SportCaribe, Lucky Super Store, Super Do It Center, High Performance Sound, ARCA Administration y Social Economic Networkers 4Life Research pa nan sosten grandi pa karate. Ta spera di por conta cu e mesun entusiasmo pa e siguiente campeonato.

Comments

comments