Recientemente e comision di mayor di Aruba Karate Bond a tene su actividad pa recauda fondo cu e meta ‘Road to Dubai 2021’. Aki ta unda e directiva di Aruba Karate Bond hunto cu e comision di mayor a logra un exitoso rifa di dos premio. Un total di 410 ticket na balor di 10 florin a keda bendi. Tabata diasabra 7 di augustus ultimo cu presidente di Aruba Karate Bond, ‘sensei’ Felix Tromp den presencia di algun miembro di directiva y señor Jesus Calderon a saca e numbernan ganador for di tombola.
Ganadornan
E resultado a keda den number di ticket 40 pa e prome premio (un smart tv ‘50’ cortesia di Aruba Karate Bond) y e number di ticket 423 pa e segundo premio (un giftcertificate cortesia di Fruktos Health). Entregamento di e premionan a tuma luga e mesun atardi. Tabata ‘sensei’ Felix Tromp cu a felicita señora Rina Mejia kende a keda hopi contento cu su television nobo y cu un sonrisa a bay cu su premio. Despues a felicita juffrouw Brittany Bedoya kende a keda sorpresa cu awor e por disfruta di un dushi desayuno di su gusto na Fruktos Health.
Gradicimento
Aruba Karate Bond ta gradici miembronan di directiva, e comision di mayor y tambe tur persona cu a cumpra nan ticket di participacion of cu di un manera of otro a duna Aruba Karate Bond nan sosten. E meta final ta pa e seleccion di Aruba Karate Bond, esta e karatekanan Juan David Velasquez y Alejandro Gonzalez Lujan, participa na e ‘WKF 25th World Edition Karate Championship’ na Dubai den luna di November. Cualkier donacion pa logra e meta aki ta bon bini y ta wordo altamente aprecia. Por haci esaki door di deposita bo aporte riba e cuenta di Aruba Karate Bond, na Arubabank number: 2527930290.
