Despues di un termino escolar exitoso, nos studiantenan cu a caba nan estudio na Aruba ta preparando pa bay sigui nan estudio den exterior. Esaki ta un logro hopi grandi den bida di nos hobennan talentoso cu ta bay cuminsa un biahe cu lo cambia nan bida pa semper. Prome Minister Evelyn Wever-Croes ta desea cada un di nos studiantenan hopi exito den e proximo añanan di nan estudio leu di Aruba, leu di nan famia y ta encurasha nan pa keda cu e mesun determinacion pa nan logra nan soño.
“Mientras cu boso ta prepara pa bandona Aruba, boso famia y amistadnan, pa persigui boso soño den exterior, ta importante pa boso compronde cu esaki no ta djis un paso pa logra exito academico, pero cu e decision aki cu boso a tuma, boso ta bula den un mundo yena cu oportunidad, crecemento y cambio. Boso ta drenta den un fase nobo di bida na unda cu boso no ta solamente representa boso mes, pero boso ta representa e speranasa y soñonan di boso famia y di Aruba. Boso ta bira embahadornan di nos pais, hibando nos cultura, nos balornan, nos tradicionnan cu boso, cu orguyo y cu honor. Semper laga atras un bon impresion di Aruba. Tene cuenta cu no ta tur ora cos ta bay manera planifica. Pero semper keda enfoca riba boso meta y keda semper positivo, irespecto kico pasa. Percura pa boso logra locual boso a bay haci den exterior.
Studia den exterior lo expone boso na ideanan nobo, na culturanan y perspectivanan diferente cu lo reta boso pa pensa diferente y crece for di boso zona comfortabel. Y tambe ta duna boso oportunidad pa conoce otro ambiente, pa siña di e mihonan, y desaroya habilidadnan cu lo forma boso futuro. Siña di experencianan nobo, sea curioso y determina. Corda semper cu cada reto cu boso encontra, ta un oportunidad pa siña y bira mas fuerte.
Na mayornan di e studiantenan, boso rol ta keda importante. Boso sosten for di leu, lo sigui guia boso yiunan y encurasha nan pa nan sigui y keda enfoca riba nan estudio. Keda conecta semper, celebra cada logro y sea e forsa ora cu nan sinti falta di ta na nan cas. Esaki ta parti di nan proceso y boso aporte y sosten lo yuda nan recarga y haya animo. Esaki ta e momentonan talves mas duro cu sigur bida no ta prepara ningun mayor p’e. Pero esaki ta e momento cu nos mester habri nos brasanan, habri hala y laga nos yiunan bay pa nan soño, biba riba nan mes den un pais straño. Sinembargo, nos mester confia cu e fundeshi di norma y balornan cu nos a duna nan, lo guia nan pa nan tuma e miho desicionnan ora nan ta riba nan mes den exterior. Hopi forsa y ban permiti nos hobennan pa nan ta riba nan mes y desaroya nan mes.
Mientras boso ta bay laga Aruba, corda cu boso no solamente ta bandona boso pais, pero boso ta hiba un pida di nos pais cu boso. Boso ta hibando soñonan di boso famia, di boso amistadnan, di boso comunidad. Boso ta forma futuro di Aruba, y Aruba ta orguyoso di boso. Reto nobo, oportunidad grandi. Cu curashi, curiosidad y determinacion, boso ta logra loke boso kier logra. Bay cu confiansa y haci boso soño bira realidad. Ohala cu pronto boso por termina boso estudio y bin bek Aruba y yuda nos sigui desaroya nos economia. Nos ta warda riba boso. Hopi exito den boso estudio y cu Dios bendiciona boso.
- Latest
