Diahuebs anochi pa 12’or di marduga a tuma lugar e estreno oficial di e exito nobo ‘Tekila’. Ta trata aki di un cancion cu Jeon a keda responsabel pa traha su melodia y letranan mientras e produccion a keda den man di Johnpaul El Increible. E artistanan cu ta aparece riba e exito ta Alex Sensation, Kiko el Crazy, Dj Adoni y tambe Jeon mes. E estreno a tuma lugar riba e plataforma di Youtube cu su video clip pero naturalmente tambe ta disponibel riba diferente plataforma manera ‘Spotify’, ‘Apple Music’ y otronan. E tema ta papia di un ambiente riba beach, un ambiente di fiesta y disfrutando di un bon tequila. Sinembargo a dicidi di scirbi e titulo di e cancion foneticamente ‘Tekila’. Hopi di esnan den e mundo di musica cu a tende e tema a duna nan aprobacion pa cu e produccion aki y ta pronostica cu e tin tur ingrediente pa ta un exito di verano tanto na radio, discoteca y plataforma digital.
E video clip a keda graba algun siman atras riba un isla cu no tin habitante serca di Miami. Un team di produccion bou di encargo di Edward Silberie di Reclight Films a percura pa tur logistica pa asina por a graba e video clip aki riba e isla. Esaki sigur no tabata algo facil mirando cu por yega e isla solamente cu boto y tabata tin mester di diferente permiso di gobierno pa por a haci e grabacion.
Jeon mes a logra di finalisa e grabacionan di su album nobo cual ta un album completamente internacional. Riba e album tin hopi exito tanto cu Jeon su so ta canta como tambe otronan cu ta hunto cu otro artistanan conoci den e genero urbano. Ja caba e album ta den su ultimo fase di ‘post-production’ y pronto lo keda lansa riba tur plataforma digital.
