E legendario “sinkhole” of “khasfa” segun rumornan uza como un sitio di ehecucion durante e campaña brutal di Estado Islamico den e area di Mosul, mas di dos aña pasa, a wordo confirma door di autoridadnan Iraki.
E “sinkhole” di 100 pia hancho, ta situa na 5 miya zuid-west di Aeropuerto. E tabata wordo uza pa ehecucionnan, ora cu victimanan tabata wordo forsa pa para den un liña y tabata wordo tira mata y tira den e buraco grandi aki. Algun di e victimanan tabata wordo tira eyden bibo.
E sitio aki a wordo descubri despues cu forsanan Iraki a toma posesion bek di e area luna pasa. Basa ariba anedoctanan, oficialnan Iraki a bisa cu miles di persona a muri eyden, durante e ultimo añanan.
Recientemente, militantenan Islamico a yena e buraco y yena esaki cu explosivonan, haciendo excavacionnan mucho mas dificil.
Pero mas prome cu e campaña brutal di Estado Islamico a cuminsa, autoridadnan Iraki tabata bringando pa excava y identifica victimanan di fosanan comun, cu ta data for di e periodo di Sadam Hussein. Mas di un miyon Iraki a wordo raporta como perdi.
Ademas di Mosul, decenas di fosanan comun a wordo haya den cercania di Sinjar, na unda cu autoridadnan ta calcula ta contene e restonan mortal di cientos di Yazidis, ehecuta door di Estado Isamico.
Fosanan comun cerca di Tikrit, conteniendo un averahe di 1.700 soldaat di Camp Speicher, masacra door di militantenan ainda ta wordo descubri despues di dos aña cu e area a cay bek bou di control di forsanan di siguridad.