CIUDAD DI VATICANO, Vaticano – Un hoben diputado Venezolano, a probecha un audiencia priva cu e Papa na Vaticano, pa propone matrimonio na su prometida, dilanti e pontifice, un gesto inusual cu a diberti y a sorprende Francisco, medionan Italiano a comenta diaranson.
E parlamentario Dario Ramirez, kende a exilia na Panama, a forma parti di un delegacion di mas of menos 80 diputado y senadornan Catolico, cu a participa den un reunion na Vaticano.
Durante e tradicional saludo na e Papa, den e imponente Sala Clementina, dentro di e palacio apostolico, e hoben diputado y su mucha muhe, a combersa pa algun minuut cu papa y diripente, el a hinca rudia y a pidi man na su prometida, loke a sorprende tur esnan presente.
“Mi a splica e santo tata cu e muhe cu tabata hunto cumi, tabata e muhe di mi bida. Cu mi a conoce den un misa, cu Dios a pon’e den mi bida y cu mi kier a propon’e matrimonio. Asina ta mi a hinca rudia y mi a puntr’e,” Ramirez a conta medionan di prensa despues.
Segun un video publica riba e pagina web di e corant Italiano Il Fatto Quotidiano, e original pidimento di matrimonio a wordo compaña pa aplauso y grito di esnan presente.
E pontifice a caba pa bendiciona e pareha, mientras por a mira cu inicialmente e gesto a molesta e encargadonan di e protocol estricto di Vaticano, kendenan despues, tambe a hari.
Fuente: www.infobae.com