Den buki di derecho civil di Corsou ta stipula cu un matrimonio por ser contrae unicamente entre un hende homber y un hende muhe. Den su veredicto di 13 di september 2021 Corte di Prome Instancia a dicidi cu e determinacion aki ta bay contra e principio di igualdad y prohibicion di discriminacion registra den articulo 3 di Areglo di Estado (constitucion di Corsou).
Segun corte no ta existi hustificacion pa nenga matrimonio civil na parehanan di mesun sexo, sigur ora no tin sistema legal comparabel manera un relacion di pareha registra.
Den e veredicto corte a para keto na e crecemento di aceptacion social pa loke ta trata relacionnan afectivo entre hende homber cu hende homber y hende muhe cu hende muhe. Esaki ta sosode mundialmente, tambe den nos region y na Corsou. Corte a mustra riba e posibilidad pa personanan di e mesun sexo contrae matrimonio den paisnan manera Colombia, Brasil, Argentina, Mexico, Boneiro y tambe na Florida. Corte a elabora cu ta e legislador ta dicidi si ta tuma e medidanan desea pa por anula e discriminacion ilicito.
Esaki tabata un decision cu Corte a tuma den e caso cu stichting Human Rights Caribbean Foundation a cuminsa contra pais Corsou.