Despues di a duna un tremendo presentacion luna pasa na e XII Copa Panama Classic, unda e gimnastanan a logra conkista varios medaya, a ricibi un otro invitacion pa competi na Puerto Rico. Esaki na unda e competencia tabata mas fuerte cu gimnastanan di Puerto Rico, Merca, Canada y Aruba.
E prome ganadornan di e Copa William Miranda Marin na Caguas Puerto Rico ta coresponde na e gimnastanan di nivel 6 di Club Gimnastico Arubano Avanse (CGA Avanse), Rebecca Spellen y Kim de Vries. E gimnasta di Aruba tabata e promenan, hunto cu demas gimnasta di nivel 6 te cu 8 y elite pa experencia y comparti e escenario cu e seleccion nacional hubenil y adulto (senior) di Puerto Rico.
E prome medayanan di e competencia internacional a bay pa Rebecca Spellen (17 aña) kende a gana oro pa e elemento “floor”. Rebecca a gana un medaya di brons tambe pa salto. Kim de Vries (12 aña) a gana un medaya di oro pa elemento “floor”, plata pa elemento bara di ekilibrio y brons pa salto. E resultadonan aki a haci cu e gimnasta Kim de Vries a bira e ganadora absoluto den puntuacion total “All Around” y a trece un medaya di oro pa Aruba.
Na e evento aki, e miho gimnastanan di e clubnan di Puerto Rico a participa, incluyendo e seleccion nacional hubenil y adulto di Puerto Rico. E presencia di e seleccion nacional di Puerto Rico riba e mesun escenario cu e gimnastanan di Aruba y e paisnan participando ta un simbolo di inspiracion pa nos gimnastanan Arubano cu ta buscando di subi nan nivel pa nan proximo competencianan.
Riba diadomingo e gimnastanan infantil y hubenil a duna nan presentacion den competencia di nivel 2, 3, 4 y 5. E gimnastanan cu a participa ta Zara Clark, Kaika Every, Milaini Gross, Dayna Nedd, Anna Boverhoff, Junaidy Odor, Sanne van Dam, Amika Every, Jesmae Jansen y Ashley Provence. E miho resultadonan ta oro “All Around” pa Zara Clark (nivel 2). Zara a gana un medaya di oro pa salto, plata pa bara asimetrico y brons pa piso. Kaika Every (nivel 2) a gana medaya di plata “All Around”, oro pa biga y plata pa bara asimetrico y salto. Dayna Nedd (nivel 2) a gana un medaya di oro pa piso. Milaini Gross (nivel 2) su miho prestacion tabata e ehercisio di vloer pa cual el a keda na di cinco luga. Junaidy Odor (nivel 3) a gana dos medaya di plata, uno pa piso y e otro pa bara asimetrico. Anna Boverhoff (nivel 3) a termina na di shete luga den salto. Sanne van Dam (nivel 4) a gana oro pa e elemento di salto y brons pa bara asimetrico. Den nivel 5, Ashley Provence a gana un medaya di oro pa salto. Amika Every a gana un medaya di plata pa salto y dos medaya di brons pa bara asimetrico y piso. Jesmea Jansen a keda na puesto number 6 “All Around”. Cu e resultadonan aki, Aruba a termina na di seis luga entre diestres team cu a participa sin cu e seleccion tabata completo. Aruba a gana un total di nuebe medaya di oro, ocho medaya di plata y seis medaya di brons.