AMSTERDAM, Hulanda- Ex Premier y ex lider di PvdA Wim Kock a fayece diasabra, segun informenan di su famia. Kok tabata Minister Presidente for di 1994 te cu 2002. E tabata tin 80 aña.
Kok a fayece den su ciudad Amsterdam na edad di 80 aña rondona door di su casa, yiu- y nietonan. El a muri na hospital a consecuencia di un atake di curason.
LIDER DI GABINETE
Kok tabata lider di dos gabinete, Paars I y Paars II. Prome cu esey e tabata minister di Financia den Gabinete Lubbers III.
Prome cu el a drenta politica, Kok tabata presidente di sindicato NVV, cu despues a bira FNV. Den añanan 80 economia tabata pasando den temponan dificil y Kok tabata briya como sindicalista. “El a haci hopi pa Hulanda y e movimento sindicalista”, segun FNV a bisa den un comunicado. “Durante su presidencia el a trece sindicatonan di antecedencia catolico y social democrata hunto na un solo sindicato di mas di un miyon miembro”.
E formacion di e prome gabinete biña tabata historico: tabata pa prome biaha den 100 aña cu CDA no tabata forma parti di gobierno.
SUCESOR
Na 1986 Kok a asumi e puesto di presidente dI PvdA. Es tempo ey, contrario na awendia, Kok no a wordo eligi, pero a wordo nombra como sucesor door di Joop den Uyl.
Su presidencia no tabata un garantia inmediato pa exito. Den e eleccionnan di 1989 PvdA a perde 3 asiento. Na 1994, e partido a perde 12 asiento. Asina mes PvdA ta bira e partido mas grandi y Wim Kok ta bira e Premier di e prome gabinete biña.
Na 1998m Kok a sa di gana hunto cu PvdA y ta bira Premier di e di dos gabinete biña (Paars II).
Partida
Menos di un siman y mei prome cu e atentadonan na New York 2001, Kok ta anuncia su retiro. Su di dos gabinete ta cay prome cu eleccion, despues di e aparacion di un rapport tocante e rol di Hulanda na Srebrenica.
Despues di su retiro e tabata activo den varios hunta di comisario den e mundo comercial, cual no semper a conta cu e apoyo di su partido.
Na 2003, Kok ta wordo nombra como minister di Estado, un titulo honorario pa un ex politico.