Airbnb e plataforma digital pa acomodacion y hospitalidad di mas grandi na mundo ta cera su prome acuerdo (MoU) di colaboracion den Caribe cu Aruba Tourism Authority (ATA). Intencion di e acuerdo aki ta pa tin igualdad fiscal den acomodacionnan riba nos isla.
Comienso di e aña aki a tuma e decision cu ta bay ‘brasa’ sharing economy como cu a ripara a base di cifranan cu e ta un trend cu no ta bayendo ningun caminda. A tuma nota cu e influencia tabata birando mas y mas no solamente aki na Aruba, sino mundialmente asina Ministerio di Turismo maneha pa ex Minister di Turismo Otmar Oduber a tuma e decision cu enbes di bringa esaki, ta brasa esaki. Sinembargo ta mantene e strategia cu ta aplica pa atrae turistanan di calidad halto na Aruba. Ta conoci cu e tipo di plataformanan manera Airbnb ta hopi popular pa un grupo di bishitante cu ta busca otro tipo di experiencia y servicio, cual e no ta ricibi kisas na un hotel. E cambio di mentalidad aki e ora a wordo trata cu tur partner y agencianan cu ta traha cu ATA.
Tambe ta paga tax
Ora a bin cu Ley di All- Inclusive, a regla pa ‘other accommodations’ tambe paga “tax”, cual tabata un di e criticanan di mas hopi cu tabata bin di parti di e hotelnan. Banda di e hecho cu hotelnan ta haya cu e tipo di acomodacionnan aki ta kitando nan cliente. Hopi biaha a haya cu tin hendenan cu apartamento na cas cual nan tabata huur pa luna pa un cierto periodo y despues a cuminsa mira cu mas hende ta huur pa anochi. Cual ta haci cu nan tambe ta competi den e mercado, pero pa ley no por a haci nada. Esaki a cambia, ya cu den e ley di All Inclusive a regla cu aworaki tur hende cu tin apartamento cu nan ta huur pa tiki dia y pues no tin contracto cu un persona cu ta biba eynan, tambe tin cu pidi permiso y paga tax.
Logro
Mas na comienso di aña, ex Minister Otmar Oduber a reuni cu Gemeente Amsterdam pasobra nan tabata un di e promenan cu a yega na un acuerdo cu Airbnb. E ora como cu ta forma parti di Reino, sr. Oduber a reuni unda cu a ricibi informacion di con nan a yega na e acuerdo aki. Despues di e encuentro ey, a keda den contacto via Skype unda cu nan a sigui guia den e miho direccion y a yuda cu e contacto di Airbnb tambe pa a splica locual ta nos necesidad aki na Aruba. A base di esey e ora mas o menos dos luna pasa, representantenan di Airbnb tabata na Aruba y cu a bolbe un biaha mas pa firma. Sr. Oduber ta felicita ATA cu e paso tuma aki cu sigur ta un gran logro.