Na cuminsamento di aña caba a papia di un inversion adicional cu mester wordo haci di mas of menos 5 miyon pa cual a bay Parlamento. Den Parlamento a mustra cu mirando e diferente efectonan cu tin na e mercado Mericano. Entre otro cu a habri 2016 cu un temporada Winter na Merca cu no tabata mes fuerte cu añanan anterior pa cual e mercado Mericano a cuminsa poco debil na cuminsamento di aña. Pero tambe consecuencianan manera Zika cu lamentablemente Aruba ta keda wordo hinca den e totalidad di Caribe, apesar cu nos tin e malesa di Zika bon controla na Aruba, condicionnan cu a conduci na varios cancelacion. A pesar di esaki, e mercado Mericano a keda responde positivo den 2016 y lo tin un crecemento leve tambe despues di cu a crece den e aña anterior na un forma hopi fuerte.
Durante e prome mita di aña a haci un inversion di mas cu 2 miyon florin adicional pa por a contraresta e fenomenonan aki. Aworaki den final di aña tambe ta inverti un suma adicional di 2 miyon pa complimenta e 5 miyon cu a bay Parlamento e tempo ey cu a bisa cu lo uza for di e fondo di contingencia. Esaki pa stabilisa y garantisa e fluho di pasaheronan for di Merca pa Aruba.
Esaki ta importante pasobra e mercado Venezolano te cu mey otro aña lo conoce disminucion a base di e Cadivi cu a wordo elimina. E ora Aruba lo keda depende di e mercado Mericano, resto di Latino America y Europa. E inversion di 2 miyon aki lo mester bay specificamente na e mercado Mericano mirando cu eynan (mas lihe) lo acapara e atencion di e viahero pa e bin Aruba. E plan cu Aruba Tourism Authority (ATA) tin pa inverti den Boston, New York y Fort Lauderdale ta uno hopi logico mirando cu eynan tin mayoria pasahero cu ta sali pa bin Aruba. Fort Lauderdale tambe ta importante pasobra desde Januari Jet Blue ta inicia cu vuelonan diario desde Fort Lauderdale cu lo por bira un hub pa henter e parti west cu ta importante pa Aruba.