Siman durante di apertura di Cosecha na San Nicolas, ex Minister Oduber a tabata presenta hunto cu e team cu a haci esaki posibel pero tambe e Minister Mike de Meza. Un tienda diferente cual ta refleha e aspecto di cultura y herencia na San Nicolas, e tienda ta encera productonan netamente di Aruba, door di nos artistanan local cu ta trahanan y ta haya seyo.
“Mi ta hopi satisfecho y orguyoso manera cu semper mi tabata y pues e ta un honor pa a wordo invita na e ocasion di apertura di Cosecha na San Nicolas. Mi tabata tey na e apertura di Cosecha na Playa cu tabata un trabou cu Minister Michelle Hooyboer – Winklaar (tempo cu e tabata Minister di Cultura) a pone su man riba dje y a logra cu por tabatin ubicacion y cu por a habri e tienda na playa cu ta un exito grandi y bon bishita pa turistanan.
Team grandi tras di apertura Cosecha
Siman pasa a habri esun na San Nicolas cual a haya asina importante pa e aspecto Cultural y di Herencia di San Nicolas. Awo nos tur ta mir’e den e beyesa den Promenade cu a habri su portanan y mi kier felicita na prome luga Stichting CRAFT cu ta e stichting cu ta maneha Cosecha Playa y San Nicolas. Tambe tur esunnan cu a kere e tempo ey den e proyecto aki manera ATA y APA cu a forma parti di henter e team hunto cu FMA, Unoca, Departamento di Cultura y otronan cu tabata un team completo pa loke ta wordo poni akinan. Kier a gradici Minister de Meza cu a reconoce mi persona como esun cu a pone e vision aki Pariba hunto cu ne tambe e tempo ey den un Gabinete 4 aña pasa unda henter e idea a inicia. Ex Minister Oduber: “Mi ta desea Minister de Meza y full e grupo hopi exito”.
Hopi emocion
“E ta yenami cu emocion pasobra ta 4 aña di trabou cu awo bo ta mira poco poco su fruto, museo a habri den Watertoren, pronto lo habri tambe Nicolas Store como museo di comunidad. Placa ta aloca caba y contract ta firma pa loke ta Uncle Louis Store y asina ta mira cu henter e plan cu a wordo invisiona 4 aña pasa awor ta bira realidad. Keremi cu den 1 – 2 aña lo mira su fruto economico tambe cu mas y mas tienda ta bay habri Pariba sigui pa mas turista,” ex Minister Oduber a bisa. ‘
Finalmente ta spera cu continua cu e di dos fase di e proyecto aki cu ta e Mainstreet di San Nicolas cual su plan ta cla, tin fondonan disponibel p’e y pues ta spera cu e por tuma luga mas pronto cu ta posibel. “Finalmente mi ta gradici pa henter e team cu a traha riba e plannan aki y tambe na e reconocemento cu mi a haya”.