Te ainda ta mira cu ta tumando basta tempo pa haya un reemplasante pa maneha e cartera grandi cu Ex Minister Otmar Oduber a sa di maneha. Un cantidad di proyecto y programa a keda pendiente pa wordo ehecuta door di e Ex Minister y Ministerio, p’esey e ta orguyoso ora cu mira continuidad den esakinan cual ta na beneficio di comunidad.
Nombracion otro Minister
Tin un gran cantidad di programa y proyectonan cu a wordo laga atras na Ministerio, sinembargo ta ripara cu ta tumando basta tempo pa haya un reemplasante. Esta un Minister cu mester bay carga e responabilidad como Minister di Turismo, Transporte, Sector Primario y Cultura. Hopi ta wordo scucha, pero ta kere cu ta te na momento cu Prome Minister anuncia e nomber, e ora ey lo wak ken (nan) lo carga e responsabilidad aki, Ex Minister Oduber a bisa.
Continuidad
Hecho ta, cu tin un cantidad di proyectonan y urgencia tambe pa desicionnan cu mester wordo tuma. Pa loke ta e pilar economico di Pais Aruba, nos Turismo mester sigui wordo guia y mas cu claro tin desicionnan cu mester wordo tuma pa futuro.
‘Mi ta contento di mira continuidad cu algun plan manera Prome Minister a menciona recientemente pa loke ta desaroyonan den caya grandi. Ambiente y musica den caya grandi, wifi pa publico usa den caya grandi entre otro ta proyectonan cu tabata wordo carga pa e Ministerio cu mi a bay laga atras. Esakinan no ta desaroyonan unda cu ta ‘mete den cartera di otro’ sino cu ta mira con pa crea ambienta pa e turista cu ta bin Aruba entre otro. Si crea un miho ambiente den caya grandi, nan lo haci uso di transporte publico of di taxi y nan gasta mas y lo tin mas motibo di gasta den comercio y retail na Aruba. Cada un di e proyectonan aki a wordo trata cu Gabinete’, ex minister Oduber a finalisa.